Toshkent shahrida yo‘l-patrul xizmati (YPX) inspektorini avtomashina bilan urib yuborgan haydovchiga nisbatan sud hukmi chiqarildi. Bu haqda “Millar” dasturida xabar berildi. Hodisa 2024-yil 12-may kuni soat taxminan 19:20 da sodir bo‘lgan, sud materiallariga ko‘ra, haydovchi BYD Han avtomashinasini transport vositasini boshqarish huquqini beruvchi hujjatlarsiz taxminan 100 km/soat tezlikda boshqarib ketgan.
Haydovchi YPX inspektorining to‘xtash haqidagi qonuniy talabini bajarmasdan, avtomashinaning old qismi bilan xizmat vazifasini bajarayotgan inspektorni urib yuborgan. Oqibatda inspektor og‘ir tan jarohati olgan. Shifokorlar ko‘rsatgan tezkor tibbiy yordam tufayli inspektorning hayoti saqlab qolingan, ammo u oyoq qismida jiddiy jarohat olgan va 34 kundan keyin hushiga kelgan, bir necha oy davomida davolangan.
Mazkur jinoyat ishi Chilonzor tuman sudida ko‘rib chiqildi. Sud hukmiga ko‘ra, sudlanuvchi Jinoyat kodeksining 104-moddasi 2-qismi “b” bandi (O‘z xizmat yoki fuqarolik burchini bajarishi munosabati bilan shaxsga yoki uning yaqin qarindoshlariga nisbatan qasddan badanga og‘ir shikast yetkazish) va 219-moddasi 2-qismida (Hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) nazarda tutilgan jinoyatlarni sodir etganlikda aybli deb topildi.
Jinoyat kodeksining 59-moddasiga (Bir necha jinoyat sodir etganlik uchun jazo tayinlash) muvofiq jazolarni qisman qo‘shish yo‘li bilan unga 6 yil muddatga ozodlikdan mahrum qilish jazosi tayinlandi. Sudlanuvchi sud zalida qamoqqa olindi. Avvalroq Toshkent shahrida 2010-yilda tug‘ilgan voyaga yetmagan bola boshqaruvidagi BMW YPX inspektori Xosilbek Eshnazarovni urib ketgan, oqibatda u vafot etgan edi, bu yangi hodisa yo‘l xavfsizligi muammolarini yana bir bor ko‘rsatib berdi.
Source: www.gazeta.uz