Rossiya Moliya vazirligi migratsiya sohasidagi davlat bojlarini sezilarli darajada oshirishni taklif qildi. Ushbu o‘zgarishlar, birinchi navbatda, O‘zbekistondan keladigan mehnat muhojirlari oqimiga bevosita ta'sir ko‘rsatishi mumkin.
Vazirlik tashabbusiga ko‘ra, asosiy migratsiya xizmatlari narxi bir necha barobarga oshadi. Xususan, ko‘p martalik viza 3 barobardan ko‘proq qimmatlab, 6 ming rublni, yashash guvohnomasi (VNZh) 30 ming rublni, vaqtincha yashash ruxsatnomasi (RVP) esa 15 ming rublni tashkil qiladi. Shuningdek, kirish taklifnomasi uchun boj 8 ming rublgacha oshadi.
Tuzatishlar hukumat komissiyasi tomonidan ma'qullangan va 2026-yil 1-iyuldan kuchga kirishi mumkin. Ular Rossiya byudjetiga yiliga 16 milliard rublgacha daromad keltirishi kutilmoqda.
Mutaxassislarning fikricha, yangilik Markaziy Osiyo davlatlaridan migratsiya oqimiga ta'sir ko‘rsatishi mumkin. Birinchi navbatda, Rossiyaga an'anaviy ishchi kuchi yetkazib beruvchi O‘zbekiston va Tojikiston fuqarolari nazarda tutilgan.
Hujjatlarni rasmiylashtirish xarajatlarining oshishi, ayniqsa, VNZh yoki RVP olishni rejalashtirganlar orasida ko‘chib o‘tish va qonuniylashtirishga qiziqishni kamaytirishi mumkin. Shu bilan birga, bojlarning oshishi ish beruvchilarga deyarli ta'sir qilmaydi: chet el ishchi kuchini jalb qilish ruxsatnomalari narxi unchalik o‘smaydi.
Tahlilchilar ogohlantirishicha, O‘zbekistondan keladigan muhojirlar sonining qisqarishi Rossiya iqtisodiyotining asosiy tarmoqlarida – qurilish, qishloq xo‘jaligi, uy-joy kommunal xo‘jaligi va savdoda kadrlar tanqisligini kuchaytiradi.
Shu bilan birga, ayrim toifadagi chet elliklar imtiyozlarni saqlab qoladi. Fuqarolik olish uchun bojlarni to‘lashdan sobiq SSSR fuqarolari, vatandoshlarni ko‘chirish dasturi ishtirokchilari va ularning oilalari, shuningdek, Rossiya armiyasida xizmat qilish shartnomasini tuzgan chet elliklar ozod qilinadi.
Avvalroq, Rossiyada 100 dan ortiq o‘zbekistonlik ishchi 4 oy davomida ish haqi va hatto eng zarur oziq-ovqat mahsulotlarisiz qolgani haqida xabar berilgan edi. Vatandoshlar oldidagi umumiy qarz 24 million rublga yetgan.
Source: podrobno.uz