Rossiyaning Qora dengizdagi yirik neftni qayta ishlash zavodi Tuapsega Ukraina dronlari tomonidan uchinchi marta hujum qilindi. Mahalliy rasmiylarning xabar berishicha, yong‘in juda kuchli bo‘lib, yaqin atrofdagi aholi evakuatsiya qilindi.

Ikki hafta oldingi zarbalar natijasida dengizga katta miqdorda neft to‘kilgan va shaharga "qora" yomg‘ir yog‘ib, hamma joyni yog‘li qoldiq bilan qoplagan edi.

Kreml Ukrainani "global energiya bozorlarida neft tanqisligini yanada kuchaytirish va beqarorlikni qo‘zg‘atishda" aybladi.

Ukraina harbiylari so‘nggi dron hujumini tasdiqlab, bunday neftni qayta ishlash zavodlari Rossiyaning 2022-yilda boshlangan keng ko‘lamli bosqinini moliyalashtirishga yordam berishini ta’kidladi.

Yong‘inni o‘chirish uchun 160 dan ortiq o‘t o‘chiruvchi jalb qilingan. Qurbonlar yo‘q. Krasnodar o‘lkasi gubernatori Veniamin Kondratyev o‘t o‘chiruvchilarning ishini "haqiqiy qahramonlik" deb atadi.

Mahalliy hokim Sergey Boyko yaqin ko‘chalardagi aholini tark etishni so‘radi va maktabda vaqtinchalik evakuatsiya markazi tashkil etildi.

Viloyat inqiroz markazi "kuchli yong‘in tufayli atmosferaga yonish mahsulotlari chiqarilayotgani" haqida ogohlantirdi. Aholiga niqob kiyish, burun, ko‘z va tomoqni chayish, derazalarni yopish va tashqarida vaqt o‘tkazishni cheklash tavsiya qilindi.

Moskvada prezident Vladimir Putin favqulodda vaziyatlar vaziriga zudlik bilan Tuapsega uchib, yong‘inni o‘chirish va tozalash ishlarini nazorat qilishni buyurdi. Putinning matbuot kotibi Dmitriy Peskov Ukraina eksport operatsiyalari uchun mo‘ljallangan neft omborlariga zarba berganini aytdi.

Ukraina harbiylari Tuapse neftni qayta ishlash zavodiga yana zarba berilganini tasdiqlab, bu "Rossiya agressorining harbiy-iqtisodiy salohiyatini kamaytirish" harakatlarining bir qismi ekanini bildirdi.

Alohida hodisada, Kiyevga Rossiya droni hujumida bir kishi yaralandi. Ukraina rasmiylari bir qancha yong‘inlar, jumladan, qabristondagi yong‘in haqida xabar berdi.

Source: www.bbc.com