Minskda O‘zbekiston va Belarus III Mintaqaviy forumi bo‘lib o‘tdi. Unda ishtirokchilar sanoat kooperatsiyasi, mintaqalararo hamkorlikni kengaytirish va o‘zaro savdo hajmini oshirish masalalarini muhokama qildi.

Forum 8-iyul kuni bo‘lib o‘tdi. Yalpi majlisda O‘zbekiston Bosh vaziri o‘rinbosari Jamshid Xo‘jayev, Belarus Bosh vaziri o‘rinbosari Yuriy Shuleyko, O‘zbekiston Savdo-sanoat palatasi raisi Davron Vaxabov, shuningdek, ikki davlat vazirliklari, mintaqaviy hokimiyat va ishbilarmon doiralar vakillari ishtirok etdi.

Uchrashuvning asosiy mavzularidan biri savdo-iqtisodiy hamkorlikni rivojlantirish bo‘ldi. Yuriy Shuleykoning so‘zlariga ko‘ra, so‘nggi o‘n yil ichida o‘zaro tovar aylanmasi 13 baravardan ko‘proq oshgan. Joriy yilning besh oyida savdo hajmi qariyb 40 foizga o‘sdi va yil yakunida 1 milliard dollardan oshishi kutilmoqda.

Forum ishtirokchilari sanoat kooperatsiyasini kengaytirish va yangi qo‘shma loyihalarni amalga oshirishga alohida e’tibor qaratdi. Xususan, qishloq xo‘jaligi, transport va logistika, oziq-ovqat sanoati, qurilish materiallari ishlab chiqarish, farmatsevtika va boshqa sohalardagi hamkorlik muhokama qilindi.

Dasturning amaliy qismi B2B va G2B formatidagi uchrashuvlardan iborat bo‘lib, unda biznes va hokimiyat vakillari yangi ishlab chiqarishlarni yaratish, investitsiya loyihalarini amalga oshirish va ikki davlat mintaqalari o‘rtasida bitimlar imzolash istiqbollarini muhokama qildi.

Erishilgan kelishuvlar O‘zbekiston va Belarus o‘rtasidagi mintaqalararo hamkorlikni mustahkamlash, sanoat kooperatsiyasini kengaytirish va o‘zaro savdoning yanada o‘sishini ta’minlashi kutilmoqda.

Eslatib o‘tamiz, O‘zbekiston Prezidenti Shavkat Mirziyoyev Belarus Prezidenti Aleksandr Lukashenkoning taklifiga binoan 8-9 iyul kunlari ushbu mamlakatga rasmiy tashrif bilan boradi.

Source: podrobno.uz