O‘zbekiston va Belarus prezidentlari Shavkat Mirziyoyev va Aleksandr Lukashenko Minskda muzokaralar o‘tkazdilar. Tomonlar o‘zaro tovar aylanmasini 2 milliard dollarga yetkazish bo‘yicha qadamlar haqida kelishib oldilar.

Muzokaralar tor tarkibda va rasmiy delegatsiyalar ishtirokida bo‘lib o‘tdi. Uchrashuv boshida Mirziyoyev so‘nggi yillarda O‘zbekiston-Belarus munosabatlari sifat jihatidan yangi bosqichga chiqqanini ta’kidladi.

Rasmiy ma’lumotlarga ko‘ra, so‘nggi besh yil ichida mamlakatlar o‘rtasidagi tovar aylanmasi deyarli uch baravarga o‘sib, o‘tgan yil yakuniga ko‘ra qariyb 1 milliard dollarga yetdi. Joriy yil boshidan buyon uning hajmi yana 30 foizga oshdi. Hozirda ikki davlatda 360 ta qo‘shma korxona faoliyat yuritmoqda.

Rahbarlar, shuningdek, qishloq xo‘jaligi, mashinasozlik, farmatsevtika, elektrotexnika, yengil sanoat, mebel va boshqa tarmoqlarda yangi kooperatsiya loyihalarini muhokama qildilar. Alohida, tomonlar tinch atom sohasida tajriba almashish va tegishli infratuzilmani qurishdan manfaatdorliklarini bildirdilar.

Bundan tashqari, O‘zbekiston va Belarus yil oxirigacha qo‘shma turistik, tibbiy va ta’lim forumlarini o‘tkazishga kelishib oldilar. Shavkat Mirziyoyev, shuningdek, Lukashenkoni O‘zbekistonga rasmiy tashrif bilan kelishga taklif qildi.

Eslatib o‘tamiz, avvalroq Minskda Shavkat Mirziyoyevning Belarusga tashrifining rasmiy qismi boshlangan edi. Mustaqillik saroyida O‘zbekiston prezidentini kutib olish tantanali marosimi bo‘lib o‘tdi, shundan so‘ng oliy darajadagi muzokaralar boshlandi.

Source: podrobno.uz