Беларусь президенти Александр Лукашенко Андижон вилоятидан яна 5 минг нафар ишчини қабул қилиш режасини эълон қилди. Сентябрдан бошлаб Витебск вилоятига 500 кишидан иборат гуруҳлар юборилади.

Лукашенконинг сўзларига кўра, қишлоқ жойларида мавжуд уй-жойлар тартибга келтирилади ва янги қурилишлар ҳам ишчилар учун амалга оширилади. "Ўзбеклар ва белоруслар учун фарқ бўлмайди. Улар бу ерда ўзларини бегона ҳис қилмасликлари керак. Фақат ишласалар бўлди", – деди у.

Ўзбекистонлик ишчилар нафақат қишлоқ хўжалигида, балки саноат, қурилиш, хизмат кўрсатиш соҳаларида ва кичик тиббий ходим сифатида ишлашлари мумкин. Витебск вилояти ҳокимияти келувчи ишчилар учун уй-жой ва зарур шароитларни тайёрлаши керак.

Шу билан бирга, томонлар қишлоқ хўжалиги соҳасида ҳамкорликни кенгайтирмоқда. Ўзбек ҳамкорларига 10 та чорва молларини боқиш хонаси ва 8 минг гектар қишлоқ хўжалиги ерлари берилади. Бешенкович туманида картошка етиштириш учун яна 2 минг гектар ажратилади. Беларусь томони технологиялар, экиш материаллари, мутахассислар ва маҳсулотни сақлаш инфратузилмасини тақдим этади.

Бундан ташқари, Ўзбекистон инвестициялари билан ёғочга ишлов бериш корхонаси қуриш, ёқилғи пеллетлари ишлаб чиқариш ва Ўзбекистон мутахассислари иштирокида қурилиш трести ташкил этиш муҳокама қилинмоқда. Витебскда Ўзбекистон товарлари савдо уйи, миллий таомлар ресторани очиш ва Ўзбекистонликлар учун туристик база яратиш режалаштирилган.

Эслатиб ўтамиз, аввалроқ Беларусьга Андижон вилоятидан 255 нафар ишчидан иборат биринчи уюшган гуруҳ келган эди. Улар қишлоқ хўжалиги ва чорвачилик соҳасида вақтинча ишлаш учун жўнатилган. Иштирокчиларга расмий ишга жойлашиш, маош ва яшаш шароитлари кафолатланган.

Source: podrobno.uz