O‘zbekiston va Qozog‘iston ekologiya idoralari vakillari atmosferadagi ifloslanish muammolariga qarshi kurashish hamda qo‘shma tashabbuslarni amalga oshirish doirasida navbatdagi ishchi uchrashuvini o‘tkazdilar. Tomonlar o‘rtasidagi muzokaralar joriy yilning 23-oktabr kuni Ostona shahrida bo‘lib o‘tdi va unda havo sifatini yaxshilash hamda yangi Mexanizmlarni joriy etish masalalari muhokama qilindi.

Ma'lum qilinishicha, o‘zbekistonlik delegatsiyaga Ekologiya, atrof-muhitni muhofaza qilish va iqlim o‘zgarishi milliy qo‘mitasi raisining o‘rinbosari Iskandar Kutbiddinov boshchilik qilgan. Shuningdek, delegatsiya tarkibidan Iqlim o‘zgarishi milliy markazi, Gidrometeorologiya xizmati agentligi hamda Ilmiy-tadqiqot gidrometeorologiya instituti mas’ul xodimlari o‘rin olgan. Qozog‘iston tomonidan esa muzokaralarga Ekologiya va tabiiy resurslar vaziri Alibek Kuantyrov rahbarlik qilgan.

Tomonlar havo muhofazasi sohasidagi hamkorlikni chuqurlashtirish, monitoring tizimlarini takomillashtirish va transchegaraviy ifloslanish manbalarini birgalikda o‘rganish muhimligini ta'kidladilar. Xususan, sa'y-harakatlarni muvofiqlashtirishning asosiy vositasi sifatida "Toza havo" davlatlararo konsorsiumini barpo etish g‘oyasi alohida diqqat markazida bo‘ldi.

Muloqot davomida 2026–2030 yillarga mo‘ljallangan maxsus yo‘l xaritasini ishlab chiqish hamda monitoring ma'lumotlarini tezkor almashish mexanizmlarini yo‘lga qo‘yish masalalari ham ko‘rib chiqildi. Ekotashkilotlar fikricha, erishilgan kelishuvlar ekologik axborot almashinuvi samaradorligini oshirishi va transchegaraviy muammolarni hal etishda yagona yondashuvlarni shakllantirishi kutilmoqda.

Shu bilan birga, "Toza havo" umummilliy loyihasi doirasida Toshkent shahrida 2026-yilning 1-aprelidan boshlab yangi sanoat zonalarini tashkil etishga nisbatan muddatsiz moratoriy joriy etilgani eslatib o‘tildi. Istisno tariqasida faqat xizmat ko‘rsatish sohasi va moliya sektoriga mo‘ljallangan maydonlargagina ruxsat berilishi belgilangan.

Source: podrobno.uz