Tojikistondagi strategik ahamiyatga ega bo‘lgan Rog‘un gidroelektr stansiyasi qurilish maydonchasida navbatdagi favqulodda hodisa yuz berdi. Dastlabki ma'lumotlarga ko‘ra, obyekt tunnellaridan birida tuproq o‘pirilishi kuzatilgan bo‘lib, buning oqibatida besh nafardan ortiq ishchi jabr ko‘rgani taxmin qilinmoqda. Ushbu hodisa 22 oktyabr kuni sodir bo‘lgani aytilishiga qaramay, mas'ul idoralar jabrlanganlarning aniq ahvoli borasida rasmiy ma'lumot berishga shoshilmayapti.

Ommaviy axborot vositalarining xabar berishicha, stansiya xodimlaridan biri halokatga qoyali hududda olib borilgan ishlar chog‘ida tuproq va tosh massasining to‘planib qolgani sabab bo‘lganini iddao qilgan. Uning so‘zlariga ko‘ra, to‘planib qolgan suv bosimi ostida ushbu massa qulab tushgan. Shuningdek, u yuz bergan holatni "qurilish sifatiga aloqasi bo‘lmagan tasodif" deb atashga urinib, biroq qurbonlar bor yoki yo‘qligini na tasdiqlagan va na rad etgan.

Xavfsizlik nuqtai nazaridan o‘z ismini oshkor etmaslikni so‘ragan guvohlarning so‘zlariga ko‘ra, bir necha kishi vayronalar ostida qolib ketgan bo‘lishi mumkin. Rog‘un GES direksiyasi esa yuzaga kelgan vaziyat yuzasidan hozircha hech qanday izoh bermagan. Ushbu obyektda xavfsizlik masalalari avvalgi yillarda ham jiddiy e'tirozlarga sabab bo‘lib kelgani ta'kidlanmoqda.

Xususan, 2024 yilning noyabr oyida ham mazkur qurilish maydonchasida mudhish avariya yuz berib, uch nafar ishchi halok bo‘lgan, yana bir kishi jiddiy jarohat olgandi. Keyingi yillarda ham obyektda xavfsizlik qoidalariga rioya etilishi borasidagi xavotirlar kamaymayapti, xususan, jalb qilingan xorijiy kompaniyalar vakillari materiallar sifati masalasida turlicha fikrlarni bildirishgan.

Source: podrobno.uz