Vengriyada 16 yildan ortiq hokimiyat tepasida turgan Viktor Orban o‘zining birinchi jiddiy raqibi – Peter Magyar bilan to‘qnash keldi. Mamlakatning milliy kuni munosabati bilan o‘tkazilgan yirik mitinglarda ikkala siyosatchi Vengriyaning kelajagi uchun mutlaqo qarama-qarshi rejalarni ilgari surdi.

O‘ng qanot, Rossiyaga yaqin bo‘lgan Orban o‘zining “tinchlik yurishi” deb atagan tadbirida o‘n minglab tarafdorlarini parlament oldiga yig‘di. U o‘z nutqida Ukrainani Vengriyaga “hujum qilishni” to‘xtatishga chaqirdi va mamlakatni urush va migratsiya kabi tahdidlardan himoya qilishga va’da berdi. Orban, shuningdek, Rossiya bilan do‘stona munosabatlarini saqlab qolish niyatida ekanligini ta’kidladi va “Brussel yoki Kiyevdan kelgan har qanday tashqi bosimga qarshi turishimiz kerak” dedi.

Shaharning narigi tomonida, Qahramonlar maydonida, Peter Magyar kamida 100 ming tarafdorga murojaat qildi. U Orbanni “Rossiya agentlarini saylovlarga aralashishga taklif qilish”da va hokimiyatni har qanday yo‘l bilan ushlab turishda aybladi. Magyar Vengriyaning G‘arb, Yevropa Ittifoqi va NATOning bir qismi ekanligini ta’kidladi va “Bu bizning taqdirimizda yozilgan” dedi. Uning tarafdorlari “Ruslar uyiga!” deb qichqirishdi.

So‘nggi so‘rovnomalarga ko‘ra, Orbannning Fidesz partiyasi Magyarning markaziy-o‘ng Tisza partiyasidan ortda qolmoqda. Bu holat aprel oyidagi qizg‘in saylovlar oldidan mamlakat siyosiy maydonida keskin qarama-qarshiliklar kuchayayotganini ko‘rsatmoqda. Vengriya Rossiya va Yevropa Ittifoqi o‘rtasidagi kesishmada turganini tan olgan Orban mamlakatni “xavfsizlik va tinchlik oroli” sifatida saqlashga intilayotganini bildirdi.

Source: www.dw.com