Birlashgan Millatlar Tashkilotining rivojlanish dasturi (UNDP) tomonidan chop etilgan hisobotga ko'ra, AQSh va Isroilning Eron bilan urushi O'rta Sharq mamlakatlariga katta iqtisodiy zarar yetkazdi. Hisobotda urushning bir oy davom etishi mintaqa YaIMini taxminan 3,7-6 foizga, ya'ni 120-194 milliard dollarga qisqarishiga olib kelishi, shuningdek, 3,7 million ish o'rinlarining yo'qolishi va yana 4 million kishining qashshoqlik chegarasidan pastga tushishi kutilayotgani ta'kidlangan.

UNDPning O'rta Sharq mamlakatlari bo'yicha mintaqaviy byurosi direktori Abdulla Al Dardari bu urushning "Arab iqtisodiyotidagi zaiflikni" ochib berganini aytdi. Uning so'zlariga ko'ra, urushning har bir kuni global iqtisodiyotga salbiy ta'sir ko'rsatmoqda. Hisobotda, asosan, Levant mintaqasi va zaif davlatlar (Sudan, Yaman)da qashshoqlik darajasining keskin oshishi kuzatilishi, chunki bu mamlakatlarning boshlang'ich zaifligi yuqori va zarbalar tezroq ijtimoiy yo'qotishlarga olib kelishi ko'rsatilgan.

Hisobotda, urush davomida Eronning Fors ko'rfazi energetika infratuzilmasiga hujumlari va Hormuz bo'g'ozidan neft va gaz eksportini qisqartirishi sababli, urush uzoqroq davom etsa, ta'sir yanada kuchayishi mumkinligi ta'kidlangan. Shuningdek, neftning qimmatlashishi va strategik dengiz yo'llaridagi xavflar inflyatsiya, savdo oqimlari va global ta'minot zanjirlariga ta'sir ko'rsatib, mintaqaning "o'zaro bog'liq iqtisodiyotlarini" zaiflashtirishi mumkin.

Livanning vaziyati alohida og'ir deb baholangan, chunki mamlakat urushga jalb qilingan va davom etayotgan havo hujumlari, evakuatsiya buyruqlari turar-joy hududlari, transport infratuzilmasi va jamoat xizmatlarini keng miqyosda vayron qilgan, shuningdek, katta ko'chishlarga sabab bo'lgan. Bu vaziyat mintaqadagi insoniy inqirozni yanada chuqurlashtirmoqda.

Source: www.aljazeera.com