Eron hukumati AQSh bilan diplomatik boshi berk ko‘chadan chiqish maqsadida yangi taklif bilan chiqdi. Tehron mintaqaviy xavfsizlik va yadro masalasini ajratib, bosqichma-bosqich hal qilishni taklif qilmoqda.

Axios nashriga ko‘ra, Eron tashqi ishlar vaziri Abbos Araqchi Pokiston, Qatar va Turkiya vositachilariga ma’lum qilishicha, konservativ doiralar Vashingtonning qattiq talablariga, jumladan uranni boyitishni o‘n yilga to‘liq to‘xtatishga qarshi. Shu sababli Eron avval Hormuz bo‘g‘ozida erkin o‘tish va xavfsizlik kafolatlarini, keyin yadroviy muzokaralarni taklif qilmoqda.

Oq uy hujjatni olganini tasdiqladi. Ma’muriyat vakili Oliviya Ueyls AQSh matbuot orqali batafsil muhokama qilmoqchi emasligini, ammo Donald Tramp Eronning yadro quroliga ega bo‘lishini butunlay istisno qiladigan kelishuvga erishishga qat’iy ekanini ta’kidladi.

Trampning o‘zi hujjatni avvalgi versiyalardan “yaxshiroq” deb baholadi, biroq taklif etilgan yon berishlarni darhol kelishuv tuzish uchun yetarli emas deb hisoblaydi.

Tahlilchilarning fikricha, bu tashabbus Tehronning iqtisodiy bosimni yumshatish va vaqt olish urinishi bo‘lib, manevr maydonini saqlab qolishga qaratilgan. Shunga qaramay, hujjatning o‘zi inqirozdan chiqish yo‘llari qidirilayotganidan dalolat beradi. Vashington hozirda Eron takliflarini Milliy xavfsizlik kengashi bilan birgalikda o‘rganmoqda.

Source: podrobno.uz