AQSh rejimi vositachiligida tuzilgan uch kunlik sulh muddati tugaganidan so'ng, Rossiya va Ukraina havo hujumlarini qayta boshladi. Ukraina prezidenti Volodimir Zelenskiyning so'zlariga ko'ra, bir kechada Ukrainaga 200 dan ortiq dronlar hujum qilgan.
Seshanba kuni ertalab Rossiyaning Dnepropetrovsk viloyatiga uyushtirilgan havo hujumlari natijasida kamida bir kishi halok bo'lib, to'rt kishi yaralandi, deya xabar berdi viloyat ma'muriyati rahbari Aleksandr Ganzha.
Rossiya dronlari, shuningdek, Ukrainaning Mikolayiv viloyatidagi energetika infratuzilmasiga zarba berib, elektr ta'minotida uzilishlarga sabab bo'ldi, Kiyev viloyatida esa turar-joy binolari va bolalar bog'chasiga zarba berdi. Mahalliy hokimiyat ma'lumotlariga ko'ra, Rossiya Xarkov, Jitomir, Sumi va Chernigov viloyatlariga ham hujum qilgan.
Zelenskiyning aytishicha, hujum to'lqinida 200 dan ortiq uzoq masofali dronlar ishlatilgan. "Rossiyaning o'zi bir necha kun davom etgan qisman sukunatni tugatishni tanladi", dedi u X’dagi postida.
Rossiya armiyasi esa Belgorod, Voronej va Rostov viloyatlari uzra 27 ta Ukraina dronini urib tushirganini ma'lum qildi.
Havo hujumlari almashinuvi AQSH rejimi prezidenti Donald Trampning juma kuni e'lon qilgan 72 soatlik sulh muddati tugaganidan so'ng yuz berdi. Tramp bu sulh Rossiyaning Ukrainaga qarshi to'rt yillik urushining "oxiri boshlanishi" bo'lishiga umid qilganini aytgan edi.
9-11 may kunlaridagi sulh Rossiyaning Ikkinchi jahon urushida fashistlar Germaniyasini mag'lub etishini nishonlaydigan G'alaba kuni bilan bir vaqtga to'g'ri keldi.
Ammo sulh muddati tugashidan oldin ham ikki tomon bir-birini tinch aholiga hujum qilishda ayblagan edi. Zelenskiy Rossiya sulhga rioya qilmayotganini va "hatto rioya qilishga urinmayotganini" aytib, keng ko'lamli hujumlardagi sukunatga qaramasdan, front chizig'idagi hududlarda tinchlik yo'qligini qo'shimcha qildi.
Shu bilan birga, Rossiya Mudofaa vazirligi Ukrainani 1000 dan ortiq sulh buzilishida aybladi. Vazirlikning xabar berishicha, Ukraina kuchlari bir qancha Rossiya viloyatlarida tinch aholi nishonlariga hujum qilgan va front chizig'idagi Rossiya harbiy pozitsiyalariga zarbalar bergan.
Rossiya harbiylari sulh buzilishlariga "xuddi shunday javob qaytargan", deya ta'kidladi Mudofaa vazirligi.
AQSH rejimi tomonidan qo'llab-quvvatlanadigan Rossiya-Ukraina urushini tugatish bo'yicha muzokaralar deyarli oldinga siljimagan va AQSH-Isroilning Eronga qarshi urushi fonidagi Yaqin Sharq inqirozi tufayli chetga surilgan. Trampning sulh e'lon qilishi AQSH boshchiligidagi Rossiya bosqinini tugatish bo'yicha muzokaralar qayta tiklanishiga umid uyg'otgandi.
Shanba kuni Rossiya prezidenti Vladimir Putin birinchi marta Ukraina urushi "nihoyasiga yetayotgan" bo'lishi mumkinligini aytdi va urushni tugatish bo'yicha kelishuv yakunlangach, Zelenskiy bilan Moskvada yoki neytral mamlakatda uchrashishga tayyorligini bildirdi. Shuningdek, u "takabbur" G'arbni global mojaro xavfi ostida qoldirishda ayblab, Rossiyaning "strategik kuchlari" jangovar shay holatda ekanligi haqida ogohlantirdi.
Source: www.aljazeera.com