Fransiyada “Ambition” kruiz laynerida norovirus infeksiyasi tarqalishi mumkinligi sababli 1,7 mingdan ortiq kishi karantinga olingan. Bu haqda France24 xabar berdi.

Karantin kemada epidemiologik vaziyat yomonlashganidan keyin joriy etilgan. Dastlab 90 yoshli yo‘lovchi vafot etgani, so‘ngra yana 50 ga yaqin kishida o‘tkir ichak infeksiyasi belgilari aniqlangani ma’lum qilingan.

Laynerda asosan Buyuk Britaniya va Irlandiya fuqarolari bo‘lgan. Kema 6 may kuni Shetland orollaridan yo‘lga chiqib, Belfast, Liverpul va Brestga tashrif buyurgan. Ispaniya portlariga rejalashtirilgan kirish bekor qilingan.

Hozirda yo‘lovchilar o‘z kabinalarida qolmoqda, fransuz shifokorlari esa sanitariya tekshiruvlari va epidemiyaga qarshi tadbirlarni o‘tkazmoqda.

Eslatib o‘tamiz, avvalroq Jahon sog‘liqni saqlash tashkiloti Atlantika okeanida “Xondius” kruiz laynerida hantavirus epidemiyasi haqida xabar bergan edi. Argentinadan 1 aprel kuni chiqqan kemada 7 ta kasallik holati aniqlangan, ulardan 3 tasi o‘lim bilan yakunlangan.

Source: podrobno.uz