«Manchester Siti» bosh murabbiyi Pep Guardiola jamoasi mavsum yakunida Premer-liga chempionligini qo‘lga kirita olmasa ham yoki FA Kubogi finalida «Chelsi»ga yutqazsa ham, mavsum muvaffaqiyatli deb hisoblanishini aytdi.

Guardiola shogirdlari shanba kuni «Uembli» stadionida «Chelsi»ga qarshi FA Kubogi finalida maydonga tushadi. Bu «shaharliklar»ning ketma-ket to‘rtinchi FA Kubogi finalidir.

«Siti» har mavsum Premer-liga va Chempionlar ligasini asosiy maqsad qilib qo‘yadi, ammo bu yil ikkala musobaqada ham kutilgan natijaga erisha olmadi. Chempionlar ligasining 1/8 finalida «Real Madrid»ga mag‘lub bo‘lgan jamoa Premer-ligada «Arsenal»dan besh ochko ortda qolmoqda.

Guardiola: «Ba’zan kuboklarni yutib, mavsum muvaffaqiyatsiz bo‘ladi. Ba’zan esa kubok yutmasdan ham mavsum ajoyib o‘tadi. Men bir necha hafta oldin aytdim: bu mavsum yaxshi o‘tdi. Haqiqatan ham yaxshi», dedi.

«Siti» so‘nggi ikki FA Kubogi finalida «Kristal Pelas» va «Manchester Yunayted»ga yutqazgan. Guardiola «Uembli»dagi 24-safariga chiqish arafasida: «Hayajon bor. Umid qilamanki, oxirgi ikki safardagidan yaxshiroq o‘ynaymiz», deya qo‘shimcha qildi.

Guardiolaning «Siti» bilan shartnomasiga bir yil qolgan va u yangi shartnoma imzolamagan. Murabbiyning «Etihad»dagi o‘n yillik faoliyatini yakunlashi mumkinligi haqida mish-mishlar tarqalmoqda.

Source: www.aljazeera.com