G‘azo sektoriga gumanitar yordam yetkazish uchun yo‘l olgan flotiliya tashkilotchilari Isroil harbiy kuchlari O‘rta dengizning sharqiy qismida 41 ta kemani bosib olganini ma’lum qildi. Global Sumud Flotiliyasining xabar berishicha, 10 ta kema esa qamaldagi Falastin anklavi tomon suzishda davom etmoqda.
Seshanba kuni ertalab suzib ketayotgan kemalar G‘azodan taxminan 121 dengiz mili (224 km) uzoqlikda bo‘lgan. 50 dan ortiq kema o‘tgan hafta Turkiyaning Marmaris port shahridan jo‘nab ketgan bo‘lib, tashkilotchilar buni Isroilning G‘azo blokadasiga qarshi chiqish missiyasining yakuniy bosqichi deb atagan.
Isroil kuchlari dushanba kuni Kipr qirg‘oqlari yaqinidagi xalqaro suvlarda kemalarni egallashni boshlagan va faollarni o‘g‘irlab ketgan. Bir qator davlatlar Isroilning flotiliyaga hujumini qoraladi. Turkiya, Ispaniya, Iordaniya, Pokiston, Bangladesh, Braziliya, Indoneziya, Kolumbiya, Liviya va Maldiv orollari tashqi ishlar vazirlari qo‘shma bayonot chiqarib, Isroil harakatlarini “xalqaro huquq va gumanitar huquqning ochiq buzilishi” deb atadi.
Bayonotda vazirlar “flotiliya ishtirokchilarining xavfsizligi haqida jiddiy tashvish bildirgan” va “barcha hibsga olingan faollarni zudlik bilan ozod qilish, ularning huquqlari va qadr-qimmatiga to‘liq hurmat ko‘rsatish”ga chaqirgan.
Al Jazira muxbiri Tariq Abu Azzumning xabar berishicha, Isroil ommaviy axborot vositalari operatsiyani so‘nggi yillarda G‘azoga ketayotgan flotiliyaga qarshi eng yirik dengiz to‘xtatish kampaniyalaridan biri sifatida ta’riflagan. Isroil Tashqi ishlar vazirligi flotiliyani “darhol orqaga qaytish”ga chaqirgan.
Irlandiyalik shifokor Margaret Konnolli, prezident Ketrin Konnollining singlisi, tashkilotchilarning so‘zlariga ko‘ra, Isroil tomonidan “noqonuniy o‘g‘irlab ketilgan”lar orasida. Prezident Konnolli Londondagi uchrashuvlardan so‘ng singlisi haqida xabar yo‘qligini aytib, “juda xavotirda” ekanini bildirgan.
Isroil 2007 yildan beri G‘azoga blokada o‘rnatgan va bu qurollarning Xamas va boshqa guruhlarga yetib borishini oldini olish zarurligi bilan izohlaydi. Huquq himoyachilari va gumanitar tashkilotlar blokadani G‘azo aholisiga nisbatan jamoaviy jazo deb tanqid qiladi.
Source: www.aljazeera.com