London metrosida (Tube) ikki kunlik ish tashlash e'lon qilindi. Transport xodimlari kasaba uyushmasi RMT a'zolari seshanba va payshanba kunlari 24 soatlik ish tashlashga chaqirilgan.

Ish tashlashga sabab – ish sharoitlarini yaxshilash talabi. RMT ma'lumotlariga ko‘ra, TfL (Transport for London) charchoq, moslashuvchanlikning kamayishi va smena davomiyligi bo‘yicha xavotirlarni bartaraf etish uchun yetarli kafolat bermagan.

TfL vakillari yangi ish jadvali bo‘yicha kafolatlar berilganiga qaramay, kasaba uyushmasi ish tashlashni davom ettirishni tanlaganidan afsusda ekanliklarini bildirdi.

Ish tashlash natijasida Circle va Piccadilly liniyalari to‘liq yopiladi. Metropolitan liniyasi Baker Street va Aldgate o‘rtasida, Central liniyasi esa White City va Liverpool Street o‘rtasida ishlamaydi.

Qolgan liniyalarda xizmat ko‘rsatish rejalashtirilgan bo‘lsa-da, TfL yo‘lovchilarni kechikishlar va cheklovlarga tayyor bo‘lishga chaqiradi. Poyezdlar ertalab soat 6:30 dan oldin ishlamaydi va kechki 21:00 dan keyin xizmat to‘xtatiladi.

RMT kasaba uyushmasi muzokaralarga ochiq ekanligini, ammo ish tashlash davom etishini ma'lum qildi. TfL esa yo‘lovchilarga safarlarini 21:00 gacha yakunlashni tavsiya qilmoqda.

Source: www.dw.com