Yamanning Mukalla, Aden va boshqa shaharlarida havo harorati 40 darajadan oshib, uylarni pechkaga aylantirdi. Uzoq muddatli elektr uzilishlari urushdan charchagan mamlakatdagi millionlab odamlarning azobini yanada kuchaytirmoqda.
Xalqaro tan olingan hukumat nazoratidagi qirg‘oq bo‘yi shaharlari aholisi uzoq vaqt elektrsiz qolayotganini, bu biznesga zarar yetkazayotganini, kundalik hayotni buzayotganini va sog‘liq muammolarini kuchaytirayotganini aytmoqda. Adenlik Saddam Al-Jamlaniyning so‘zlariga ko‘ra, elektr energiyasi sakkiz soat uzilib, atigi ikki soat berilgan.
Eron qo‘llab-quvvatlagan hutiylar nazoratidagi shimoliy hududlarda ham vaziyat yaxshi emas. O‘n yildan ortiq davom etgan urush infratuzilmani, jumladan elektr tarmoqlarini vayron qilgan. Saudiya Arabistoni tomonidan qo‘llab-quvvatlanadigan hukumat va hutiylar o‘rtasidagi mojaro minglab odamlarning o‘limiga, millionlab odamlarning ko‘chishiga olib kelgan.
Yanvar oyida Saudiya Arabistoni 81,2 million dollarlik yordam paketini e’lon qilib, elektr stansiyalarini ishga tushirish uchun yoqilg‘i sotib olishga va’da bergan edi. Biroq yoz kelishi bilan vaziyat yana yomonlashdi. 27 may kuni Saudiya Arabistoni yana 150 million dollarlik yordam paketini e’lon qildi, ammo aholi hali sezilarli yaxshilanishni kuzatmagan.
Mukallalik Salah Muhammad va uning rafiqasi kuniga besh soatdan kam uxlab, teri kasalliklaridan azob chekmoqda. Ular kechalari issiqlik va namlik tufayli uxlay olmay, masjidning konditsionerli zaliga borishga majbur bo‘lishadi. “Yozda hech qanday qulaylik yo‘q. Faqat masjidda salqin bo‘ladi”, deydi u.
Elektr uzilishlari biznesga ham jiddiy zarar yetkazmoqda. Mukalladagi avtota’mirlash ustaxonasi xodimi Muhanad Salemning aytishicha, elektr uzilishlari jihozlarni ishdan chiqarib, ishchilarni generator yoqilg‘isiga pul sarflashga majbur qilmoqda. Baliq sotuvchisi Omer Baesa esa kuniga 10 000 yaman riali (6,7 dollar) sarflab, muz sotib olishiga qaramay, ba’zi baliqlar buzilayotganini aytadi.
Yamanning yangi tayinlangan elektr energetikasi vaziri Adnan al-Kof vaziyatni “halokatli” deb atab, “yoz qiyin bo‘ladi” degan. Hutiy nazoratidagi hududlarda aholi asosan quyosh energiyasiga tayanmoqda. Isroil havo hujumlari esa vaziyatni yanada murakkablashtirmoqda. Hodeyda shahrida aholi elektr to‘lovlarining keskin oshganidan norozi.
Source: www.aljazeera.com