Yevropa Ittifoqi Narkotiklar Agentligi (EUDA) yangi hisobotida qit'aning noqonuniy narkotik bozori jadal rivojlanayotgani, ayniqsa kuchli sintetik opioidlar muammosi kuchaygani haqida xabar berdi.

Hisobotga ko'ra, 2025-yilda Yevropada kamida 50 ta yangi psixoaktiv modda aniqlangan. Ayniqsa, nitazenlar deb ataluvchi moddalar kokain, geroin va ketamin kabi keng tarqalgan giyohvand moddalar tarkibida topilmoqda.

EUDA ijrochi direktori Lorreyn Nolan: "Narkotik bozorlari tez sur'atlar bilan o'zgarib, ko'chalardagi moddalar tarkibi oldindan aytib bo'lmaydigan darajada xavfli bo'lib bormoqda. Bu odamlarning o'zlari bilmagan holda yuqori quvvatli giyohvand moddalarni iste'mol qilish xavfini oshiradi", dedi.

Narkotik tashish usullari ham o'zgargan: kokain endi kichik, kam nazorat qilinadigan portlar orqali olib kirilmoqda. Kontrabandachilar dronlar, tezyurar qayiqlar va hatto yarim suv osti kemalaridan foydalanmoqda.

Hisobotda ta'kidlanishicha, narkotik yetkazib berish zanjiriga Yevropa shaharlarining kam ta'minlangan hududlaridan yoshlarni jalb qilish kuchaygan. Ular nafaqat logistika va savdo, balki qo'rqitish, zo'ravonlik va hatto buyurtma qotilliklarda ham ishtirok etmoqda.

Yevropada eng ko'p ishlatiladigan giyohvand modda kannabis bo'lib qolmoqda: 15-64 yoshdagi 24,9 million kishi so'nggi yilda kannabis iste'mol qilgan. Noqonuniy kannabis bozori qiymati taxminan 12 milliard yevroni tashkil etadi.

Kokain ikkinchi o'rinda: 2024-yilda 4,3 million kishi kokain iste'mol qilgan. EUDA ma'lumotlariga ko'ra, 2024-yilda kamida 7600 kishi giyohvand moddalardan o'lgan, aksariyat hollarda bir nechta moddalar birgalikda iste'mol qilingan.

Source: www.dw.com