Nigeriyaning shimoli-g‘arbiy qismida sobiq harbiy general Rabe Abubakar va uning rafiqasi noma’lum qurolli guruh tomonidan o‘g‘irlab ketilgan. Mahalliy matbuot va hukumat bayonotiga ko‘ra, general asirlikda diabet va gipertoniya asoratlaridan vafot etgan.

Abubakar ikki hafta oldin Katsina shtatida “banditlar” deb atalgan to‘da tomonidan o‘g‘irlab ketilgan edi. U Nigeriya armiyasining sobiq matbuot kotibi bo‘lgan. Ichki xavfsizlik vazirligi bayonotida “uning xavfsiz ozod etilishi uchun qilingan tinimsiz va birgalikdagi harakatlarga qaramay, vaziyat fojia bilan yakunlandi” deyiladi.

AFP agentligi xavfsizlik manbasiga tayanib, Abubakar va uning rafiqasi to‘yga ketayotganda pistirmaga uchraganini xabar qildi. Nigeriyaning “Punch” gazetasi o‘tgan hafta o‘g‘irlab ketuvchilar garovga olingan er-xotinni qo‘yib yuborish uchun uchta hibsga olingan jangchini ozod qilishni va xavfsizlik operatsiyalari paytida musodara qilingan chorva mollarini qaytarishni talab qilgani haqida yozgan.

Katsina shtati Nigeriyaning shimoli-g‘arbiy va markaziy qismlaridagi jinoiy guruhlar faoliyat yuritadigan bir qancha shtatlardan biridir. “Banditlar” muntazam ravishda qishloqlarga bostirib kirib, aholini tovon puli uchun o‘g‘irlab ketadi va uylarni talon-taroj qilgandan keyin yoqib yuboradi.

Eng so‘nggi hujumda qurollangan shaxslar Zamfara shtatidagi Goron Namaye shahrida dalada ishlayotgan kamida 17 fermerni o‘ldirib, 13 nafarni yaralagan. O‘tgan yil avgust oyida Katsina shtatida qurollangan shaxslar masjidga hujum qilib, o‘nlab odamlarni o‘ldirgan edi.

Source: www.dw.com