Rossiyada sun’iy intellekt yordamida yaratilgan videolar va fotosuratlar ijtimoiy tarmoqlarda keng tarqalmoqda. Ularda Ukraina urushida halok bo‘lgan yoki bedarak yo‘qolgan rus askarlari go‘yo uyga qaytayotgan, yaqinlarini quchoqlayotgan holda tasvirlangan. Bu kontent, asosan, askarlarning oila a’zolari tomonidan buyurtma qilinadi.

Mashhur blogger Katya Jin (taxallus) Instagram’da 15 soniyalik AI-video joylashtirgan. Unda qorli Moskva ko‘chasida “Maxsus harbiy operatsiya tugadi” degan bannerlar ko‘rinadi, ayol erini kutib oladi. Aslida uning eri frontda bedarak yo‘qolgan. BBC Jin bilan bog‘langach, u AI-kontentini olib tashlagan.

Yana bir yaratuvchi Anna Korableva “Vidolashuv videosi” loyihasini boshlagan. Uning so‘zlariga ko‘ra, mijozlar asosan Ukrainada halok bo‘lgan askarlarning qarindoshlari. Ular marhumlarni “quchoqlash” va “xayrlashish” imkoniyatini qidirmoqda. Korableva dastlab har kuni yig‘laganini, keyin his-tuyg‘ularni ajratishni o‘rganganini aytadi.

BBC va Mediazona ma’lumotlariga ko‘ra, urushda kamida 225 000 rus askari halok bo‘lgan, haqiqiy son esa ancha yuqori. Rossiya hukumati rasmiy yo‘qotishlar haqida ma’lumot bermaydi.

AI-videolar narxi 200 rubldan (2 funt) 10 000 rublgacha (100 funt) o‘zgaradi. Ba’zi yaratuvchilar, masalan, Ulyana Lebed, oyiga 150-200 000 rubl ishlab topadi – bu Rossiyadagi o‘rtacha oylik ish haqidan ikki baravar ko‘p. Bu amaliyotni ba’zilar qayg‘udan pul ishlash deb tanqid qiladi.

Kembrij universiteti tadqiqotchisi Katarzyna Nowaczyk-Basińska bu texnologiyani “chuqur muammoli” deb baholaydi. Uning fikricha, AI-visualizatsiyalar qayg‘uni engillashtiradimi yoki chuqurlashtiradimi, noma’lum. Ba’zi mijozlar bu videolar ularga yengillik bermaganini tan olgan, ammo boshqalar “yaqinim bilan birga bo‘lish imkoniyati” uchun minnatdorchilik bildirgan.

Source: www.bbc.com