Rossiya kuchlari tomonidan Ukrainaning bir qancha shaharlariga uyushtirilgan keng ko‘lamli raketa va dron hujumlari natijasida kamida 9 kishi halok bo‘ldi, yana o‘nlab odamlar yaralandi. Hujumlar, ayniqsa, poytaxt Kiyev va Xarkov shaharlariga jiddiy zarar yetkazdi.

Kiyevdagi hujumlarda 4 kishi halok bo‘lgan bo‘lsa, Xarkovda rossiyalik harbiylarning zarbasi natijasida kelib chiqqan yong‘inni o‘chirish chog‘ida 5 nafar qutqaruvchi hayotdan ko‘z yumdi. Kiyev meri Vitaliy Klitschkoning ma’lum qilishicha, dron va raketa hujumlari binolar va avtomobillarga o‘t qo‘yib, poytaxtda 140 mingdan ortiq aholini elektr ta’minotisiz qoldirdi.

Eng katta yo‘qotishlardan biri — Kiyev-Pechersk Lavra monastiri majmuasidagi 11-asrga oid Uspenskiy soborining jiddiy shikastlanishi bo‘ldi. Ukraina Bosh vaziri Yuliya Sviridenko bu hujumni “xalqimiz va merosimizga qarshi shafqatsiz tajovuz” deb atadi. Tashqi ishlar vaziri Andriy Sibiga esa YUNESKO va boshqa xalqaro tashkilotlarni “davlat barbarligi”ga munosib javob berishga chaqirdi.

Rossiya tomonida ham talofotlar bor: Tula shahrida Ukraina dronlari hujumi natijasida 3 kishi halok bo‘lib, 3 kishi, jumladan bir yoshli bola yaralandi. Ayni paytda Ukrainaning aksariyat hududlarida havo hujumi signallari eshitilmoqda.

Polsha Rossiya hujumlariga javoban qiruvchi samolyotlarni havoga ko‘tarib, yer usti havo mudofaasi tizimlarini shay holatga keltirdi. Bu hujumlar Fransiyada bo‘lib o‘tadigan G7 yig‘ilishi arafasida sodir bo‘ldi. Yakshanba kuni Ukraina prezidenti Volodimir Zelenskiy AQSh prezidenti Donald Tramp bilan uzoq davom etayotgan mojaroni tugatish yo‘llarini muhokama qilgan edi.

Source: www.bbc.com