Kolumbiya terma jamoasi bosh murabbiyi Nestor Lorenzo O‘zbekiston milliy futbol jamoasi haqida yuqori fikrda ekanligini bildirdi. Uning so‘zlariga ko‘ra, jahon chempionatida hech bir raqibni kamsitib bo‘lmaydi.
“Jahon chempionatlari shuni ko‘rsatadiki, kichik jamoalar mavjud emas. O‘zbekiston kuchli raqiblarga qarshi yaxshi natijalarga erishgan jamoa. Ularning ajoyib murabbiyi, to‘rt-beshta yuqori darajadagi futbolchisi bor, eng muhimi, bu o‘z o‘yinini aniq biladigan uyushgan jamoa”, — dedi Lorenzo.
Lorenzo O‘zbekistonning past blokda yaxshi harakat qilishini, uch yoki besh himoyachi bilan mudofaa qilishini, xavfli kontrataklar uyushtirishini va standart vaziyatlardan foydalanishini ta’kidladi.
“Bu juda intizomli jamoa, ular bilan ehtiyot bo‘lish kerak. Ularning aniq uslubi bor. Bunga qarshi turish uchun biz to‘pni nazorat qilishimiz, bo‘sh zonalarni topishimiz va chiziqlarni ochishimiz kerak. Bizdan sabr va hujumlarni yakunlashda agressivlik talab etiladi”, — deya qo‘shimcha qildi u.
Lorenzo Kolumbiyaning o‘yinga taktik rejasi tayyorligini aytdi. Jamoa mudofaa va hujumda qanday harakat qilishni tushunadi, muhim omil — yakka kurashlarda g‘alaba qozonish qobiliyati.
Shuningdek, mutaxassis Xames Rodrigesning holati haqida gapirdi. U futbolchining yaxshi holatda ekanligini va asta-sekin formaga kirib kelayotganini ta’kidladi. “Xamesning iste’dodi unga o‘yinga aniqlik kiritish va muhim epizodlarni hal qilish imkonini beradi”, — dedi Lorenzo.
Jamoa kayfiyati haqida gapirganda, bosh murabbiy futbolchilar mamlakat oldidagi mas’uliyatni to‘liq anglab yetganini qayd etdi. “Mening jamoaga xabarim har doim bir xil: o‘yindan zavqlanish, minnatdor bo‘lish va Kolumbiya terma jamoasi libosida maydonda jon berish. Biz sakkiz yildan so‘ng jahon chempionatiga qaytdik, katta umidlar va o‘zimizni ko‘rsatish istagi bor”, — dedi u.
Lorenzo, shuningdek, barcha 26 futbolchining yaxshi holatda ekanligini ma’lum qildi. Uning so‘zlariga ko‘ra, Jon Kordoba mashg‘ulotlarga qaytgan va maydonga chiqishga tayyor.
Murabbiy Luis Dias haqida ham fikr bildirdi, uning uchun bu jahon chempionati faoliyatidagi birinchi bo‘ladi. Lorenzo futbolchining turnirga katta ishtiyoq bilan yondashayotganini va kuchli mundial o‘tkazishi kerakligini ta’kidladi. “Jahon chempionatiga kelgan har bir futbolchi bolalik orzusini eslaydi. Lucho aynan shunday”, — dedi Kolumbiya murabbiyi.
Nihoyat, Lorenzo Kolumbiya terma jamoasi jahon chempionatida o‘z uslubi va xarakterini ko‘rsatishni xohlashini ta’kidladi. “Kolumbiya — bu quvonch. Xalqimizga tabassum qilish uchun sabab kerak, terma jamoa aynan shu maqsadda yaxshi o‘ynashni xohlaydi”, — deb yakunladi murabbiy.
Eslatib o‘tamiz, O‘zbekiston — Kolumbiya uchrashuvi 18-iyun kuni Toshkent vaqti bilan soat 07:00 da boshlanadi.
Source: uznews.uz