Isroil rejimi tomonidan G‘azoning markaziy qismidagi Dayr al-Balah shahrida amalga oshirilgan havo hujumida kamida uch kishi halok bo‘ldi, deb xabar berdi Falastin sog‘liqni saqlash idoralari.

Al-Aqso shahidlar kasalxonasi ma’lumotiga ko‘ra, dushanba kungi hujumda sakkiz yoshli bola va ikki erkak halok bo‘lgan, bir necha kishi yaralangan. Hujum Vadi Salqa ko‘prigi yaqinidagi al-Baraka ko‘chasida sodir bo‘lgan.

Falastin axborot agentligi Wafa halok bo‘lganlarni Ali Fayez Isbaitan, Hassan Salmon al-Hanajra va sakkiz yoshli Malik Voil Abu Shavish deb nomladi. Shuningdek, Isroil harbiy mashinalari Nusayrat qochqinlar lageridagi Salohiddin ko‘chasiga o‘q otish va bombardimon ostida kirib kelgan.

Oktyabr oyida kuchga kirgan “sulh”ga qaramay, Isroil rejimi anklavga zarbalar berishda davom etmoqda. Yakshanba kuni G‘azoda Isroil hujumlari kamida to‘rt falastinlikni, jumladan 13 yoshli qizni o‘ldirgan va bir necha kishini yaralagan.

G‘azo hukumat matbuot kotibiyati “sulh” kuchga kirganidan beri 1045 falastinlik halok bo‘lganini va 3380 kishi yaralanganini ma’lum qildi. Ushbu idora kelishuvning 3465 ta buzilishini hujjatlashtirgan.

Falastin Sog‘liqni saqlash vazirligi 2023-yil oktabridan beri Isroilning G‘azodagi genotsid urushi natijasida 73 054 falastinlik halok bo‘lganini va 173 480 kishi yaralanganini tasdiqladi. Isroil bosh vaziri Binyamin Netanyahu rejim kuchlarining G‘azoning 70 foizini egallashini talab qilmoqda.

Source: www.aljazeera.com