Avstraliya Bosh vaziri Entoni Albanese Fidji poytaxti Suvaga tashrifi chog'ida Fidji hamkasbi Sitiveni Rabuka bilan yangi iqtisodiy va mudofaa ittifoqini imzoladi. Ushbu kelishuv ikki davlat o'rtasidagi munosabatlarni mustahkamlashga qaratilgan bo'lib, Kanberra mintaqadagi Xitoy ta'sirini cheklashga intilmoqda.

Avstraliya tashqi ishlar departamenti bayonotiga ko'ra, ittifoq Avstraliya va Fidjining tinch, farovon va xavfsiz mintaqaga bo'lgan sadoqatini mustahkamlaydi. Albanese X ijtimoiy tarmog'idagi postida "Tinch okeani – bu uy. Shu sababli bu tashrif avstraliyaliklar uchun muhim. Umumiy muammolarni hal qilish, yangi imkoniyatlar yaratish. Birgalikda" deb yozdi.

Yangi imzolangan shartnomaga ko'ra, Fidji va Avstraliya ularning suverenitetiga tahdid solishi mumkin bo'lgan har qanday "xavfsizlik bilan bog'liq o'zgarishlar" yuzasidan bir-birlari bilan maslahatlashishga kelishib oldilar. Hujjatda aytilishicha, shartnomaning maqsadi tomonlarning suverenitetini himoya qilish, o'zaro mudofaa va xavfsizlik manfaatlarini ta'minlash hamda Tinch okeani mintaqasidagi barqarorlikka hissa qo'shishdir.

Avstraliya allaqachon AQSh, Yangi Zelandiya va Papua-Yangi Gvineya bilan mudofaa shartnomalariga ega. Fidji esa sobiq Bosh vazir Frank Bainimarama davrida Pekinga yaqinlashgan edi. 2022-yilda Xitoy Solomon orollari bilan maxfiy xavfsizlik ittifoqi imzolab, mintaqada doimiy harbiy mavjudlik yaratishi mumkinligi haqida xavotirlarni keltirib chiqargandi.

Biroq 2022-yilda Rabuka hokimiyatga kelganidan so'ng, Pekinning oroldagi ta'siri susaydi. 2025-yilda rahbar Fidjida Xitoyning doimiy harbiy mavjudligi bo'lishi mumkinligi haqidagi takliflarni rad etib, "Agar ular kelishni xohlasa, ularni kim kutib oladi? Fidji emas. Menimcha, Xitoy buni yaxshi tushunadi" degan edi.

Source: www.dw.com