Ukraina poytaxti Kiyevga dushanba kuni ertalab Rossiya tomonidan ballistik raketa hujumi uyushtirildi. Shahar meri Vitaliy Klitschkoning ma'lum qilishicha, kamida bitta bino to'g'ridan-to'g'ri zarbaga uchragan.

Klitschko Telegram kanalida Kiyevning tarixiy Podil tumanidagi binoning yettinchi va to'qqizinchi qavatlari orasida odamlar vayronalar ostida qolgan bo'lishi mumkinligini aytdi.

Mahalliy hokimiyat ma'lumotlariga ko'ra, hujumlar natijasida kamida uch kishi halok bo'lib, yana sakkiz kishi yaralangan. Besh kishi Kiyevdagi kasalxonaga, uch kishi esa Buchadagi kasalxonaga yotqizilgan.

Shaharning boshqa qismlarida ham dron qoldiqlari topilgan. Avvalroq Klitschko raketa hujumi sababli aholini boshpana izlashga chaqirgan, shahar harbiy ma'muriyati rahbari esa kelayotgan ballistik raketalar haqida ogohlantirgan edi.

O'tgan payshanba kuni Kiyevga uyushtirilgan bir qator Rossiya hujumlarida kamida 30 kishi halok bo'lgan, bu esa shaharda motam kunining e'lon qilinishiga sabab bo'lgan. Bu yilgi eng og'ir hujumlardan biri edi.

Rossiya qo'shni davlatga to'liq miqyosli bostirib kirganidan beri Ukraina shaharlariga doimiy ravishda dron va raketalar bilan hujum qilmoqda. Bu mojaro Ikkinchi jahon urushidan beri Yevropadagi eng qonli to'qnashuv hisoblanadi.

AQSh rejimi boshchiligidagi vositachilik urinishlari hozirgacha muvaffaqiyatsizlikka uchradi. Ukraina prezidenti Volodimir Zelenskiy kelasi hafta Turkiyadagi NATO sammitida AQSh rejimi rahbari Donald Tramp bilan uchrashishi kutilmoqda.

Source: www.dw.com