Apple kompaniyasi ChatGPT ortidagi kompaniya OpenAI va uning ikki sobiq xodimini tijorat sirlarini o'g'irlashda ayblab, sudga da'vo arizasi bilan murojaat qildi. Arizada aytilishicha, sobiq xodimlar Apple’ning maxfiy ma'lumotlarini OpenAI’ning iste'molchi qurilmalari sohasidagi faoliyati uchun o'zlashtirgan.

Da'vo Kaliforniya federal sudiga berilgan bo'lib, unda Apple’ning sobiq katta tizim elektr muhandisi va iPhone hamda Apple Watch dizayni bo'yicha sobiq vitse-prezidenti, shuningdek OpenAI Foundation, OpenAI Group PBC va io Products kompaniyalari javobgar sifatida ko'rsatilgan.

Apple ta'kidlashicha, ayblanuvchilardan biri kompaniya tomonidan berilgan ish laptopini qaytarishdan bosh tortgan va keyinchalik autentifikatsiya xatosidan foydalanib, Apple’ning ichki tarmog'iga kirib, «o'nlab maxfiy apparat bilan bog'liq fayllarni» yuklab olgan. Ikkinchi ayblanuvchi esa kompaniyadan ketishdan oldin Apple yetkazib beruvchilari haqidagi ma'lumotlar va ichki sanoat xulosalarini o'z elektron pochtasiga yuborgan.

41 sahifalik shikoyatda Apple «har bir darajada, texnik xodimlardan tortib apparat bo'limi boshlig'igacha, OpenAI Apple’ning tijorat sirlari va maxfiy ma'lumotlarini o'g'irlagan» deb da'vo qilmoqda. Bu da'vo ikki texnologik gigant o'rtasidagi munosabatlarni keskinlashtirdi, chunki avval ular hamkorlik qilib, Apple foydalanuvchilariga Siri orqali ChatGPT natijalariga kirish imkonini bergan edi.

O'tgan yili OpenAI sobiq Apple dizayneri Jony Ive tomonidan asos solingan io Products apparat startapini sotib olgan edi. OpenAI qanday qurilma yaratayotganini aniq ochiqlamagan, faqat «an'anaviy mahsulot va interfeyslardan tashqariga chiqadigan» AI bilan o'zaro aloqa qilishning yangi usulini topishga intilayotganini aytgan.

Source: www.dw.com