Syerra-Leone hukumati sobiq prezident Ernest Bay Koromaga qo‘yilgan barcha ayblovlarni, jumladan, xiyonat va davlat to‘ntarishiga urinishda ishtirok etish ayblovlarini bekor qildi. Bu haqda mamlakat axborot vaziri Chernor Bah BBC’ga ma’lum qildi.
72 yoshli sobiq prezident 2023-yil noyabrida sodir bo‘lgan davlat to‘ntarishiga urinish bilan bog‘liq holda hibsga olingan edi. O‘shanda qurollangan shaxslar harbiy ombor va bir necha qamoqxonalarga bostirib kirib, 2000 ga yaqin mahbusni ozod qilgan edi. Koroma har doim ayblovlarni rad etib kelgan.
Ayblovlar sog‘liq sababli bekor qilingan. Koroma 2024-yil yanvaridan beri Nigeriyada surgunda yashab kelayotgan edi. Uning so‘zlariga ko‘ra, “tinchlik, adolat va yarashuv har doim qiyinchiliklardan ustun kelishiga ishonch” saqlanib qolgan.
Koroma Syerra-Leone prezidenti Julius Maada Bio, Nigeriya prezidenti Bola Tinubu va G‘arbiy Afrika davlatlari iqtisodiy hamjamiyatiga (ECOWAS) qo‘llab-quvvatlagani uchun minnatdorchilik bildirdi. ECOWAS vositachiligida Koromaga tibbiy yordam olish uchun Nigeriyaga ketishga ruxsat berilgan edi.
Bosh prokuror Koromaga qarshi ishni to‘xtatish to‘g‘risida ariza bergan. Bahning qo‘shimcha qilishicha, sobiq prezident endi istalgan vaqtda Syerra-Leonega qaytishi va odatdagi faoliyati bilan shug‘ullanishi mumkin.
Koroma 2018-yilgacha 11 yil davomida Syerra-Leoneni boshqargan, keyin hozirgi prezident Bio saylangan. 2024-yilda davlat to‘ntarishiga urinishda ishtirok etgan 11 fuqaro va 24 askar aybdor topilib, uzoq muddatli qamoq jazolariga hukm qilingan edi.
Source: www.bbc.co.uk