Buyuk Britaniya hukumati xodimi Kongo Demokratik Respublikasida (KDR) Ebola bilan kasallangan bemorlarni davolaganidan so‘ng, London shifoxonasiga evakuatsiya qilindi.

Buyuk Britaniya Sog‘liqni saqlash xavfsizligi agentligi (UKHSA) bu chora “juda ehtiyotkorlik chorasi” ekanini ta’kidladi. Xodimda hozircha hech qanday alomat yo‘q va u yaxshi ahvolda.

Agentlik ma’lumotlariga ko‘ra, Ebola inkubatsiya davri 2 kundan 21 kungacha davom etadi. Shaxs ushbu davr mobaynida izolyatsiyada qattiq kuzatuv ostida bo‘ladi.

Buyuk Britaniyada Ebola bilan kasallanish holatlari tasdiqlanmagan va aholi uchun xavf past darajada qolmoqda.

UKHSA epidemik va yangi infeksiyalar direktori Richard Pebodi: “Bu shaxs haddan tashqari ehtiyotkorlik bilan ko‘chirildi va uning ahvoli yaxshi ekanidan mamnunmiz”, dedi.

O‘tgan oy Glazgo shifoxonasida Ebola gumoni bilan bir bemor tekshirilgan, ammo test salbiy chiqqan edi.

May oyida KDR va Ugandada Ebola epidemiyasi Jahon sog‘liqni saqlash tashkiloti tomonidan xalqaro ahamiyatga ega favqulodda vaziyat deb e’lon qilingan edi.

Virus yovvoyi hayvonlardan odamga yuqadi, so‘ngra qon, sekretsiyalar va ifloslangan yuzalar orqali tarqaladi. Alomatlar orasida isitma, charchoq, mushak og‘rig‘i, qusish va diareya bor.

Source: www.theguardian.com