Fransiya janubidagi Le Porge qishlog'ida sodir bo'lgan yong'inlar natijasida 400 ga yaqin tarixiy o'q-dorilar topildi. Mahalliy hokimiyat ma'lumotlariga ko'ra, bu o'q-dorilar Ikkinchi jahon urushi davridan qolgan.

Yong'in paytida eshitilgan portlashlar dastlab gaz ballonlari deb hisoblangan, biroq mahalliy o't o'chiruvchilar ularni issiqlik ta'sirida portlagan urush qoldiqlari deb taxmin qilmoqda. Qishloq meri Martial Zaninetti France Info nashriga bergan intervyusida, ikkinchi kechada 100 dan ortiq portlash eshitilganini va bu "urush ovozi"ni eslatganini aytdi.

Merning so'zlariga ko'ra, munitsipalitet hududida ko'milgan o'q-dorilar omborlari bor edi, ammo ular bu haqda bilishmagan. "O'q-dorilar o'ngga, chapga uchib ketdi, hatto bittasi uyning ichidan o'tib ketdi", dedi u. Hozirda deminaj ishlari olib borilmoqda va aksariyat aholi uylariga qaytgan, biroq ba'zi hududlar hali ham xavfli deb hisoblanmoqda.

Yong'in natijasida 180 dan ortiq uy vayron bo'lgan. Okeanga, kampingga va La Jenny qishlog'iga kirish hali ham taqiqlangan. Topilgan o'q-dorilar nemis va fransuz ishlab chiqarishi bo'lib, ular orasida minomyot snaryadlari va tankga qarshi raketalar bor.

Gironde mintaqasidagi o'rmon yong'inlari taxminan 10 kun davom etganidan so'ng nazorat ostiga olindi. Fransiya Bosh vaziri Sebastyan Lekornu o't o'chiruvchilarga minnatdorchilik bildirib, "Frantsiya misli ko'rilmagan inqirozga qarshi turib oldi" dedi. U evakuatsiya qilingan aholi asta-sekin uylariga qaytayotganini ta'kidladi.

Yevropada, ayniqsa Fransiya va Ispaniyada yong'inlar ikki hafta davom etdi, 330 mingdan ortiq odam evakuatsiya qilindi. Fransiya janubi-g'arbida 42 ming gektar maydon yonib ketdi, bu Ikkinchi jahon urushidan keyingi eng yirik o'rmon yong'inlaridan biri bo'ldi.

Source: www.bbc.co.uk