Indoneziyaning Yava dengizida bo'ron paytida aloqani yo'qotgan yo'lovchi paromida bir kishi halok bo'ldi va 102 kishi evakuatsiya qilindi. Bu haqda mahalliy rasmiylar ma'lum qildi. Virgo Transport 8 paromi bortida 243 kishi bo'lgan va yakshanba kuni erta tongda operator bilan aloqani yo'qotgan, deb xabar berdi Indoneziya qidiruv-qutqaruv agentligi.

Kema shanba kuni Indoneziyaning Yava orolidagi Surabaya shahridan jo'nab, Borneo orolidagi Banjarmasin port shahriga yo'l olgan edi. Qutqaruvchilar qolgan yo'lovchilar va ekipaj a'zolarini qidirmoqda. Banjarmasin shahridagi mahalliy qidiruv-qutqaruv idorasi rahbari I Putu Sudayananing so'zlariga ko'ra, kema noqulay ob-havo sharoitiga tushib qolgan.

AFP axborot agentligining xabariga ko'ra, paromning oxirgi ma'lum bo'lgan joyi Banjarmasindan taxminan 81 dengiz mili (150 km) uzoqlikda, Yava dengizida bo'lgan. Qutqaruv kemalari va vertolyot hududni kezmoqda, ammo Sudayananing aytishicha, 2,5 metrgacha (8,2 fut) balandlikdagi to'lqinlar operatsiyani qiyinlashtirmoqda.

"Kemalar uchun bu juda xavfli. Hatto bizning 40 metr (131 fut) uzunlikdagi Basarnas kemamiz ham katta xavf ostida", dedi Sudayana jurnalistlarga. U mamlakat qidiruv-qutqaruv agentligiga ishora qilgan edi.

O'tgan oy Bali va Lombok o'rtasida qatnovchi paromda yong'in chiqib, bir kishi halok bo'lgan va besh kishi bedarak yo'qolgan edi. Iyul oyida esa Sulavesi janubidagi Selayar oroli yaqinida 70 dan ortiq kishi bo'lgan parom cho'kib ketgan edi.

Source: www.aljazeera.com