Kubada elektr tarmog‘i yana ishdan chiqdi, natijada mamlakatning katta qismi zulmatga ko‘mildi. Davlat elektr kompaniyasi Union Electrica (UNE) shanba kuni poytaxt Gavanada iste’molchilarning deyarli yarmi elektr ta’minotiga qaytarilganini ma’lum qildi. «Sharoit imkon bergani sari tiklash bosqichma-bosqich amalga oshirilmoqda», — deyiladi kompaniyaning ijtimoiy tarmoqdagi bayonotida.
Bu 2024-yil oxiridan buyon kamida 12-uzilish bo‘lib, yil boshidan beri oltinchi hodisadir. Dastlab mamlakatning sharqiy beshta provinsiyasini, jumladan Gavanani qamrab olgan uzilish keyinchalik butun orolga tarqaldi. Kubа hukumati Reuters agentligiga juma kuni uzilish sababi mamlakat markazidagi yuqori kuchlanishli elektr uzatish liniyalaridagi nosozlik ekanini aytdi. UNE esa «beqaror ob-havo sharoitlari» ham ta’sir qilganini qo‘shimcha qildi.
Ko‘p yillardan buyon Kubaning eskirgan infratuzilmasi va yoqilg‘i taqchilligi vaqti-vaqti bilan elektr uzilishlariga olib kelmoqda. Ammo AQSh yanvar oyida mamlakat hukumatiga siyosiy va iqtisodiy bosim o‘tkazish maqsadida energiya blokadasini joriy etganidan so‘ng, uzilishlar tez-tez uchraydigan bo‘ldi. Birlashgan Millatlar Tashkilotining inson huquqlari bo‘yicha ekspertlari AQShning neft blokadasini xalqaro huquqning buzilishi deb qoralab, taqchillik va uzilishlar tobora keskinlashib borayotgani sababli Kuba «jim G‘azo»ga aylanishi mumkinligidan ogohlantirdi.
Orol aholisining bir qismi juma kungi uzilish paytida allaqachon elektrsiz qolganini aytdi. «Kecha 24 soat elektrsiz o‘tkazdim. Bir soatga chiroq yoqishdi, keyin tarmoq qulab tushdi», — dedi Reuters agentligiga Gavanada yashovchi 23 yoshli Frenk Loreso. Boshqalar, masalan, Lidiya Fernandes AFP agentligiga yoqilg‘i taqchilligi import qilinadigan dizel bilan ishlaydigan zaxira generatorlarini ishga tushirishni qiyinlashtirayotganini aytdi. «Hammasi birin-ketin: suv yo‘q, ovqat pishirish uchun gaz yo‘q, elektr yo‘q», — dedi 36 yoshli o‘qituvchi. U qo‘shimcha qildi: «Rostini aytsam, qanday qilib aqldan ozmaganimizga hayronman».
Source: www.aljazeera.com