Niderlandiyaning Gaaga shahrida immigratsiya va boshpana siyosatiga qarshi o'tkazilgan norozilik namoyishi politsiya bilan to'qnashuvlarga sabab bo'ldi. Taxminan 500 nafar o'ta o'ng qarashli namoyishchilar politsiyaga tosh va pirotexnika vositalarini otishgan, natijada huquq-tartibot idoralari kuch ishlatishga majbur bo'lgan.
Mahalliy hokimiyat vakillarining ma'lum qilishicha, namoyish davom etayotgan zo'ravonliklar sababli to'xtatilgan. Politsiya tayoq va xizmat itlaridan foydalanib, shahar markazidagi Malieveld bog'ida yig'ilganlarni tarqatgan. Namoyishchilar shahar markazidan olib chiqilib, 24 kishi hibsga olingan. Vaziyatni nazoratga olish uchun suv purkagichlar ham qo'llanilgan.
Bosh vazir Rob Jetten ijtimoiy tarmoqdagi sahifasida namoyishchilar politsiya bilan ataylab to'qnashuvga kirishganini va «jirkanch» o'ta o'ng hamda antisemit shiorlar aytganini ma'lum qilgan. Adliya vaziri David van Weel ham zo'ravonlik va shiorlarni keskin qoralab, «Malieveld bog'idan bir xil manzaralar: Gitlerga salom, antisemit shiorlar, politsiyaga qarshi zo'ravonlik va otryadlarga pirotexnika otish» deb yozgan. U bunday harakatlarga qarshi qat'iy choralar ko'rilishini ta'kidlagan.
«Wij zijn het volk» («Biz xalqmiz») shiori ostida o'tkazilgan miting Niderlandiya hukumatining immigratsiya siyosatiga qarshi norozilik sifatida tashkil etilgan. Namoyishchilar Gaaga bo'ylab yurishni rejalashtirgan, biroq zo'ravonlik boshlangach, mahalliy hokimiyat yurishni taqiqlab, namoyishni tarqatishga buyruq bergan. Mamlakatning eng yirik axborot agentligi ANP xabariga ko'ra, mitingda Gitlerga salom bergan shaxs ko'rilgan, sahnada esa «Niderlandiya — gollandlar uchun» degan yozuv aks etgan ekran o'rnatilgan.
31 yoshli mexanik Tays Yansen AFP agentligiga bergan intervyusida: «Biz o'z mamlakatimizni yo'qotmoqdamiz. Biz haqiqatan ham ommaviy migratsiya tufayli mamlakatimizni yo'qotmoqdamiz», — degan. Bu voqea Niderlandiyada bir yil avval Gaagada bo'lib o'tgan shunga o'xshash norozilik namoyishidan keyin yuz berdi. O'shanda ham politsiya suv purkagichlardan foydalanib, namoyishni tarqatgan, qora kiyimli namoyishchilar bilan to'qnashuvlarda politsiya mashinasi yoqib yuborilgan va markazchi D66 partiyasining bosh qarorgohiga hujum uyushtirilgan edi. O'sha partiya rahbari Rob Jetten hozir mamlakat bosh vaziri.
Source: www.aljazeera.com