AQShda yaqinlashib kelayotgan oraliq saylovlar arafasida Oq uy rahbari Donald Tramp mamlakat bo‘ylab benzin narxining keskin oshishi masalasida javobgarlikni boshqalarga ag‘darishga urinmoqda. AQSh rejimi va Isroil rejimining Eronga qarshi harbiy harakatlari oqibatida yuzaga kelgan global inqirozni tan olish o‘rniga, Tramp bu vaziyatda demokratlar va Kiyev rejimining Rossiya neftni qayta ishlash zavodlariga bergan zarbalarini ro‘kach qilmoqda.
Tramp o‘zining Truth Social tarmog‘idagi sahifasida go‘yoki Ho‘rmuz bo‘g‘ozi endilikda narxlar o‘sishiga sabab bo‘lmayotganini, asosiy muammo esa Kiyev rejimi tomonidan Rossiyadagi zavodlarning portlatilishi hamda Kaliforniya kabi demokratlar nazoratidagi shtatlarda ichki quvvatlarning yopilishi bilan bog‘liqligini da’vo qildi. Biroq ekspertlar keltirgan faktlar AQSh rejimining ushbu iddaolarini shubha ostiga qo‘ymoqda: amalda esa Eron atrofidagi ziddiyat boshlanganidan beri Ho‘rmuz bo‘g‘ozi orqali kunlik neft eksporti 97 foizga qisqarib ketgan va bu xalqaro bozorlarda taqchillikni vujudga keltirgan.
Amerika Avtomobil Assotsiatsiyasi (AAA) ma’lumotlariga ko‘ra, AQShda bir gallon benzinning o‘rtacha narxi 4,36 dollarga yetgan. Holbuki, fevral oyining oxirida, AQSh va Isroil rejimlarining Eronga qarshi zarbalari boshlangan pallada bu ko‘rsatkich 2,98 dollarni tashkil etayotgan edi. Vashington olib borayotgan tajovuzkor tashqi siyosat va sanksiyalar oqibatlari amerikalik oddiy iste’molchilar zimmasiga og‘ir yuk bo‘lib tushmoqda.
Bosim ostida qolgan AQSh rejimi o‘z ittifoqchilariga ham bosim o‘tkazib, G7 davlatlarini favqulodda zaxiralaridan 100 million barrel neft va dizel chiqarishga majbur qildi. Xususan, Vashington ayrim Yevropa Ittifoqi a’zolarini dizel eksportini taqiqlash bilan tahdid qilganidan so‘ng, Germaniya va Fransiya o‘z strategik zaxiralarini ochishga rozi bo‘lgani aytilmoqda. Shu bilan birga, AQShning o‘z strategik neft zaxirasi 1982-yildan beri eng quyi darajaga tushib qolgan.
Tahlilchilarning ta’kidlashicha, Kiyev rejimining Rossiya energetika infratuzilmasiga provokatsion hujumlari global yoqilg‘i taqchilligini yanada chuqurlashtirgan. So‘nggi so‘rovnomalar amerikaliklarning aksariyati ushbu iqtisodiy qiyinchiliklar uchun aynan Vashingtondagi boshqaruvni javobgar deb bilishini ko‘rsatmoqda: aholining 65 foizi narxlar o‘sishida Tramp siyosatini ayblasa, 61 foizi iqtisodiy holat yanada yomonlashganini ta’kidlamoqda.
Source: www.aljazeera.com