Nigeriya janubi-g‘arbidagi Ondo shtatida bortida 32 kishi bo‘lgan harbiy samolyot halokatga uchradi. Hodisa ortidan mamlakat rasmiylari zudlik bilan keng ko‘lamli qidiruv-qutqaruv operatsiyasini boshlab yubordi.

Aviatsiya vaziri Festus Keyamoning ma’lum qilishicha, havo kemasining qoldiqlari Igbokoda shahridagi harbiy-dengiz bazasi yaqinida aniqlangan. Samolyot Benin shahridan Lagosga yo‘l olgan va parvoz chog‘ida radarlardan g‘oyib bo‘lgan. Dastlabki ma’lumotlarga tayanilsa, uning bortida 25 nafar yo‘lovchi hamda 7 nafar ekipaj a’zosi bo‘lgan.

Havo harakatini boshqarish dispetcherlari mahalliy vaqt bilan soat 09:13 da samolyot bilan aloqani yo‘qotgan. Shundan so‘ng ekipaj bilan radioaloqa orqali bog‘lanishga qaratilgan bir necha bor urinishlar hech qanday natija bermagan.

Nigeriya Harbiy-havo kuchlari qulagan samolyot ATR-42 rusumli bo‘lib, u Lagos tomon rejali parvozni amalga oshirayotganini tasdiqladi. Ayni paytda halokat sodir bo‘lgan joyga maxsus qutqaruv guruhlari jalb etilgan. Vazir Keyamo harbiy rahbariyat bilan doimiy muloqotda ekanini va qutqaruv ishlariga barcha ko‘mak ko‘rsatilayotganini bildirdi. Hozircha halok bo‘lganlar yoki jarohatlanganlar bo‘yicha rasmiy ma’lumotlar e’lon qilinmadi.

Source: www.aljazeera.com