Falastin rahbari Mahmud Abbos so'nggi 20 yil ichida ilk bor o'tkzilishi rejalashtirilgan parlament saylovlarini yana bir bor qoldirishga qaror qildi va bu haqda tegishli farmonni imzoladi. Rasmiy Wafa axborot agentligining xabar berishicha, kelasi oyga belgilangan qonunchilik saylovlari endilikda prezidentlik ovoz berish jarayoni bilan birlashtirilib, 2027 yilning 11 sentyabriga ko'chirildi.

Ushbu kutilgan parlament ovoz berishi avvalroq noyabr oyiga belgilangan, prezidentlik saylovlari esa 2027 yil boshida o'tkzilishi ko'zda tutilgan edi. Mazkur qaror yuqori martabali falastinlik amaldorlardan iborat qo'mita shanba kuni tongda ovoz berishni kechiktirish masalasini muhokama qilish uchun yig'ilganidan so'ng qabul qilindi.

Mahmud Abbos boshchiligidagi Falastin Ozodlik Tashkiloti Ijroiya qo'mitasining bayonotida aytilishicha, bosib olingan Sharqiy Quddus, G‘arbiy Sohil va G‘azo sektoridagi og'ir sharoitlar saylov o'tkazishga imkon bermaydi. Go'yoki Isroil tomonidan saylov materiallari va xalqaro kuzatuvchilarning G'azoga kiritilishiga to'sqinlik qilinayotgani asosiy sabab sifatida keltirildi.

Ta'kidlanishicha, Isroil rejimi tomonidan amalga oshirilayotgan harbiy reydlar, aholi punktlarini kengaytirish va soliq tushumlarini ushlab qolish kabi harakatlar adolatli saylov o'tkazishni imkonsiz qilmoqda. Shuningdek, G'azoni qayta tiklash ishlaridagi sustkashliklar ham mazkur qarorga ta'sir ko'rsatgani aytilmoqda.

Mazkur kechiktirish amaldagi falastinlik rahbarlarning mavqeini saqlab qolishiga xizmat qilibgina qolmay, Falastin ma'muriyatining xalqaro donorlar va mahalliy aholi oldidagi obro'siga jiddiy putur yetkazishi kutilmoqda. Oxirgi marta parlament saylovlari 2006 yilda o'tkazilgan bo'lib, o'shanda Hamas harakati g'alaba qozongan edi, 90 yoshli Mahmud Abbos esa 2005 yildan beri prezidentlik lavozimini egallab kelmoqda.

Source: www.aljazeera.com