Xalqaro migratsiya tashkilotining (XMT) ma'lumotlariga ko‘ra, Jibuti qirg‘oqlari yaqinida ichida yuzlab odamlar bo‘lgan kema halokatga uchragan va buning oqibatida kamida 109 nafar muhojir, jumladan 15 nafar bola hayotdan ko‘z yumgan. Fojiadan so‘ng o‘nlab odamlar bedarak yo‘qolgan deb hisoblanmoqda, qutqaruv ishlari davom etmoqda.

Ma'lum qilinishicha, kema Obok port shahri yaqinida payshanba kuni kechqurun ag‘darilib ketgan. Bortda jami 350 nafar yo‘lovchi bo‘lgan, ulardan taxminan 80 nafari qutqarib qolingan. XMTning Jibutidagi vakili Aleksandr Koissak bu fojiani muhojirlar duch kelayotgan xavf-xatarlarning navbatdagi achchiq eslatmasi deb atadi.

Statistika ma'lumotlariga ko‘ra, har yili Afrika shoxidan o‘n minglab insonlar Fors ko‘rfazi mamlakatlariga yetib borish va ish topish umidida ushbu xavfli yo‘lga otlanishadi. Garchi Yaman hududida o‘n yildan ortiq davom etib kelayotgan va vayronagarchiliklarga olib kelgan fuqarolar urushi davom etayotgan bo‘lsa-da, qashshoqlik va iqlim o‘zgarishlari odamlarni tavakkal qilishga majburlamoqda.

XMT xodimlarining aytishicha, joriy yilda mazkur yo‘nalish bo‘ylab harakatlanayotganlar soni 18 foizga oshgan. Tashkilot mahalliy hokimiyat organlari bilan birgalikda omon qolganlarga tibbiy yordam ko‘rsatmoqda va halok bo‘lganlarning jasadlarini dafn etish ishlarini tashkil qilmoqda.

Source: www.bbc.co.uk