Britaniyaning The Times nashri tarqatgan maʼlumotlarga koʻra, Xalqaro futbol federatsiyasi (FIFA) doirasidagi muxolif kuchlar tashkilotning amaldagi rahbariyatiga qarshi kurashish uchun yangi nomzodni qidirmoqda. Guvohlik berishlaricha, ular Londonning “Arsenal” klubining sobiq bosh murabbiyi, taniqli mutaxassis Arsen Vengerni kelgusidagi saylovlarda asosiy raqib sifatida koʻrishni istamoqda.

Xabarlarga koʻra, ayni paytda 76 yoshni qarshilagan frantsiyalik mutaxassisni ushbu mas'uliyatli lavozimga nomzodini qoʻyishga koʻndirishga qaratilgan harakatlar boshlab yuborilgan. Venger 2019-yildan buyon FIFA tarkibidagi futbolni global rivojlantirish boʻlimiga rahbarlik qilib kelmoqda va uning boshqaruv tizimidagi tajribasi muxoliflar e'tiborini tortgan.

Tashkilotning amaldagi rahbari Janni Infantino FIFAni 2016-yildan beri boshqarib kelmoqda va u oʻz lavozimini saqlab qolish niyatida ekanini bir necha bor ta'kidlagan. Biroq, uning siyosatidan norozi boʻlgan guruhlar muqobil variantlarni qidirishda davom etmoqda. Eslatib oʻtamiz, navbatdagi saylovlar 2027-yilning mart oyiga belgilangan boʻlib, hozircha “Tottenxem” va Shveysariya terma jamoasining sobiq himoyachisi Ramon Vega ham oʻz nomzodini ilgari surish istagini bildirgan xolos.

Source: kun.uz