Isroil rahbari Binyamin Netanyaxu G‘azo sektoridagi harbiy harakatlarda sun'iy intellekt tizimlaridan foydalanilgani va tinch aholi vakillari qurbon bo‘lgani haqida hikoya qiluvchi mashhur hujjatli film mualliflari hamda anonim manbalarga nisbatan jiddiy tergov harakatlarini boshlashni talab qildi. Ushbu shov-shuvli «NAZA» deb nomlangan film mamlakat harbiy tuzilmalaridagi yashirin ma'lumotlarning sizib chiqishiga sabab bo‘lgani aytilmoqda.

Bosh vazir Netanyaxu o‘zining ijtimoiy tarmoqdagi sahifalarida bosh shtab boshlig‘i, Shin Bet rahbari va bosh prokurorga murojaat qilib, filmda ishtirok etgan shaxslarni davlat sirlarini oshkor qilish, tuhmat qilish hamda Isroilning xalqaro xavfsizlik va diplomatik manfaatlariga putur etkazish ayblovlari bilan jinoiy javobgarlikka tortishni qat'iy talab qildi. Uning ta'kidlashicha, mazkur kartina mamlakat obro‘siga jiddiy zarar etkazuvchi noto‘g‘ri va xolis bo‘lmagan bayonotlarni tarqatmoqda.

Xabarlarga ko‘ra, Venetsiya xalqaro kinofestivalida yuqori baholangan ushbu film Isroil siyosiy doiralarida keskin noroziliklarga sabab bo‘ldi. Rejissyorlar Yuval Avraam va Rachel Szor davlatga xiyonatda ayblanib, hatto ularning fuqaroligini bekor qilish tahdidlari ham yangradi. Isroil armiyasi rahbariyati esa bildirilgan barcha da'volarni qat'iyan rad etib, zarbalar faqat inson omili orqali tasdiqlanishini ta'kidlab kelmoqda.

Ayni paytda, Isroil rejimi tomonidan G‘azoda olib borilayotgan harbiy harakatlar oqibatida o‘n minglab tinch aholi vakillari halok bo‘lgani xalqaro hamjamiyatda jiddiy xavotir uyg‘otmoqda. Shu bilan birga, mahalliy huquqni muhofaza qiluvchi tashkilotlar ijodkorlarga nisbatan bosim va tahdidlarni qoralab, so‘z erkinligini himoya qilishga chaqirmoqda.

Source: www.aljazeera.com