Buyuk Manchester Birlashgan Ma'muriyati bayonotiga ko'ra, o'sha paytdagi shahar meri Endi Bernem bir necha yil oldin investitsiya sammitida "Manchester Siti" raisi Xaldun al-Muborak bilan uchrashgan. Bu haqda dushanba kuni e'lon qilindi va siyosatchining futbol klubi rahbariyatini ochiqdan-ochiq qo'llab-quvvatlagani keskin tanqidlarga sabab bo'ldi.
Ma'lum qilinishicha, o'n karra Angliya chempioni bo'lgan "Manchester Siti" Premer-liganing moliyaviy qoidalarini buzganlikda aybdor deb topilganidan so'ng, Bernem klub egalari jamoani sotib yuborsa "juda xavotirga tushishini" aytgan edi. Ushbu bayonot ortidan Britaniya hukumati hech kim "qoidalardan ustun emasligini" ta'kidlab, vaziyatni yumshatishga urindi va orqaga qadam tashlashga majbur bo'ldi.
Shundan so'ng, Bernemning Birlashgan Arab Amirliklari qirollik oilasi a'zosi Shayx Mansur bin Zoid Ol Nahayon nazoratidagi Abu Dabi United Group tomonidan boshqariladigan klub egalari bilan munosabatlariga oydinlik kiritish talablari kuchaydi. Birlashgan Ma'muriyat vakili 2021 yil oktabr oyida rasmiy uchrashuv bo'lib o'tganini tasdiqlagan bo'lsa-da, muxolifat vakillari bu ma'lumotlar yetarli emasligini va to'liq oshkoralik talab qilinishini ta'kidlamoqda.
Muholifadagi Konservativlar partiyasining sport bo'yicha vakili Lui Frenchning fikricha, tarqatilgan bayonotda uchrashuvlarda nima muhokama qilingani va qanday kelishuvlarga erishilgani haqida juda kam ma'lumot mavjud. Uning ta'kidlashicha, Bernem ma'muriyat ortiga yashirinmasdan, o'z harakatlari uchun shaxsan javobgarlikni o'z zimmasiga olishi shart.
Eslatib o'tamiz, "Manchester Siti" 2009 va 2018 yillar oralig'idagi to'qqiz mavsum davomida daromadlarni sun'iy ravishda oshirish va xarajatlarni kamaytirish uchun soxta shartnomalar tuzganlikda ayblanib, Premer-liganing yuzdan ortiq moliyaviy qoidalarini buzganlikda aybdor deb topilgan edi. Klub apellyatsiya shikoyatini kiritgan bo'lib, agar mag'lub bo'lsa, ularni ulkan ochkolardan mahrum qilish yoki hatto chempionatdan chetlatish xavfi kutib turibdi.
Source: www.aljazeera.com