Keyp-Taunda Afrika energiya haftaligi o'z ishini davom ettirmoqda. Ushbu anjuman davomida investorlar, neft kompaniyalari rahbarlari hamda vazirlar qit'aning ulkan uglevodorod va foydali qazilma zahiralarini muhokama qilmoqdalar. Ma'lum qilinishicha, Afrika dunyodagi eng yirik neft, gaz va ko'plab muhim minerallar konlariga egaligiga qarammay, aholining katta qismi hamon elektr energiyasidan mahrum holatda qolmoqda.

Qit'a taxminan 125 milliard barrel tasdiqlangan neft zahiralariga ega bo'lib, bu global ko'rsatkichning 7,2 foizini tashkil etadi. Liviya va Nigeriya Afrika zahiralarining deyarli 70 foiziga egalik qiladi. Shu bilan birga, Liviyadagi siyosiy ziddiyatlar va blokadalar neft qazib olish hajmiga salbiy ta'sir ko'rsatib kelmoqda. G'arb kompaniyalari, jumladan Italiyaning Eni va Fransiyaning TotalEnergies korxonalari ushbu hududlarda o'z manfaatlarini ko'zlab faoliyat yuritmoqda.

Shuningdek, Afrika yashil energiya va elektromobillar uchun zarur bo'lgan kobalt, marganets hamda litiy kabi muhim minerallarning asosiy yetkazib beruvchisi hisoblanadi. Jumladan, Kongo Demokratik Respublikasi global kobalt ishlab chiqarishning qariyb 70 foizini ta'minlaydi. Biroq xalqaro tashkilotlar ushbu konlardagi ishchilar uchun o'ta xavfli va og'ir sharoitlar saqlanib qolayotganini bir necha bor ta'kidlagan.

Qit'aning energetika sohasidagi paradoksi shundaki, ulkan boyliklarga qaramay, Sahroi Kabirdan janubdagi hududlarda yashovchi 560 milliondan ortiq odam elektr energiyasidan foydalana olmaydi. Jahon sog'liqni saqlash tashkiloti ma'lumotlariga ko'ra, bu global elektr tanqisligining 85 foizini tashkil etadi. Nigeriyaning o'zida 85 million aholi hamon chiroqsiz yashamoqda.

Source: www.aljazeera.com