Jahon sogʻliqni saqlash tashkiloti maʼlumotlariga koʻra, Yamanda soʻnggi uch hafta ichida vabo kasalligiga chalinganligi taxmin qilinayotgan holatlar soni uch baravarga koʻpaygan. Mutaxassislarning taʼkidlashicha, buning asosiy sababi tinch aholining yangi toʻqnashuvlar hududidan qochib, ogʻir sanitariya sharoitidagi qochqinlar lagerlariga boshpana izlab kelayotganidir.

Tashkilotning seshanba kuni eʼlon qilgan hisobotida qayd etilishicha, kuchaygan jangovar harakatlar oqibatida 200 mingdan ortiq kishi oʻz uylarini tark etishga majbur boʻlgan. Natijada, 6–12-sentabr kunlari 217 ta shubhali holat qayd etilgan boʻlsa, 27-sentabrdan 3-oktabrgacha boʻlgan davrda bu koʻrsatkich 647 taga yetgan.

BMT agentligining mintaqadagi favqulodda vaziyatlar boʻyicha direktori Annett Xayntselman shunday deydi: “Mojarolardan qochayotgan oilalar endilikda oldini olish va davolash mumkin boʻlgan kasalliklar tahdidiga duch kelmoqda. Agar zudlik bilan mablagʻ ajratilmasa va xavfsiz ichimlik suvi hamda zarur tibbiy xizmatlar bilan taʼminlanmasa, epidemiya zaif jamoalar orasida tezlikda tarqalishi mumkin”.

Joriy yilda mamlakatda 8 034 ta shubhali holat va 27 ta oʻlim holati qayd etilgan boʻlib, ularning toʻrtdan bir qismi soʻnggi toʻrt haftaga toʻgʻri keladi. Kasallikning eng koʻp tarqalishi mamlakat janubi-gʻarbidagi Abyan, Lahij, Taiz va Aden kabi qochqinlar koʻp joylashgan hududlarga toʻgʻri kelmoqda.

Source: www.aljazeera.com