Braziliya Senati juma kuni ish haftasini 44 soatdan 40 soatga qisqartirishni nazarda tutuvchi konstitutsiyaviy o‘zgarishni tasdiqladi. Mazkur qaror ish haqini qisqartirmagan holda amalga oshirilishi kutilmoqda va bu mamlakat rahbari Luyis Inasiu Lula da Silvaga 25-oktabr kuni bo‘lib o‘tadigan ikkinchi tur saylovlari oldidan qo‘shimcha siyosiy ustunlik taqdim etishi taxmin qilinmoqda.

Chap qanot qarashlarga ega bo‘lgan yetakchi Lula da Silva saylovoldi poygasida o‘z pozitsiyasini mustahkamlash maqsadida so‘nggi kunlarda bir qator shubhali va populist qadamlarni tashladi. Jumladan, yoqilg‘i soliqlarini kamaytirish, subsidiyalarni uzaytirish hamda millionlab kichik biznes subyektlarining qarorlarini kechirib yuborish haqida va'dalar berildi. Biroq ish haftasini qisqartirish masalasi saylovchilar e'tiborini qozonish uchun asosiy qurolga aylangani aytilmoqda.

«6x1» formati sifatida tanilgan ushbu islohot hukumat ma'lumotlariga ko‘ra, 37 milliondan ortiq ishchiga naf keltirishi kutilmoqda. Shunga qaramay, mazkur qonunchilik soyadagi iqtisodiyotda band bo‘lgan millionlab frilanserlar va kurerlarni chetda qoldirgani tanqidga uchramoqda. Biznes vakillari esa bu o‘zgarish xarajatlarni keskin oshirib yuborishidan xavotir bildirmoqda.

O‘ng qanot senatori va sobiq prezident Jair Bolsonaruning o‘g‘li Flavio Bolsonaro dastlab mazkur tashabbusga keskin qarshi chiqqan bo‘lsa-da, keyinchalik uning yuqori ommaviyligini ko‘rib o‘z pozitsiyasini o‘zgartirishga majbur bo‘ldi. Oy boshida bo‘lib o‘tgan birinchi tur saylovlarida Bolsonaro raqibidan oldinda bo‘lib, Lula uchun jiddiy sinov keltirib chiqargan edi.

Source: www.dw.com