Britaniyaning mudofaa sanoati giganti boʻlgan BAE Systems kompaniyasi dronlar toʻdasiga qarshi moʻljallangan kuchli mikrotoʻlqinli quroli ochiq poligonlardagi sinovlardan muvaffaqiyatli oʻtgani va texnologik tayyorlikning oltinchi darajasiga yetganini maʼlum qildi. Ushbu yangi tizim nishonlarga anʼanaviy oʻq-dori oʻrniga yoʻnaltirilgan elektromagnit energiya yordamida taʼsir koʻrsatishga ixtisoslashgan.

Kompaniya AUSA–2026 koʻrgazmasida AQSH hukumati va uning harbiylari uchun ikkita yangi ishlanmani namoyish etdi. Bularga kuchli mikrotoʻlqinli HPM tizimi hamda havodagi va yerdagi nishonlarga qarshi qoʻllanadigan MDACS koʻp maqsadli artilleriya kompleksi kiradi. AQSH rejimi vakillari bu kabi texnologiyalarga katta umid bogʻlayotgani iddao qilinmoqda, biroq ularning amaldagi samaradorligi va iqtisodiy asosliligi hali toʻliq tasdiqlanmagan.

HPM tizimi ommaviy dron hujumlarini toʻxtatish uchun moʻljallangan boʻlib, elektr taʼminoti mavjud ekan, yangi nishonlarga ketma-ket zarba berishi mumkin. Bu esa anʼanaviy qurollardan farqli oʻlaroq, oʻq-dori zaxirasini muntazam toʻldirib turish zaruratini kamaytiradi. Shunga qaramay, mutaxassislar bunday murakkab tizimlarning dala sharoitida qanchalik chidamli boʻlishiga shubha bilan qarashmoqda.

BAE Systems vakillarining soʻzlariga koʻra, HPM konstruksiyasining 99 foizdan ortigʻi ochiq bozorda mavjud boʻlgan tijorat komponentlaridan iborat. Modulli tizimni statsionar holda, shatakka olinadigan kompleks sifatida yoki turli jangovar mashinalarda joylashtirish koʻzda tutilgan. Shuningdek, ikkinchi ishlanma boʻlgan MDACS artilleriya majmuasi havo nishonlarini yuqori tezlikdagi snaryadlar bilan tutib qolishga qaratilgan.

Source: kun.uz