Neftga boy Alberta provinsiyasida Kanada tarkibida qolish yoki mamlakatdan ajralish bo'yicha huquqiy jarayonni boshlash masalasi bo'yicha ovoz berish jarayoni boshlanmoqda. Ushbu muhim siyosiy voqea fonida Kanada rahbari Mark Karni Alberta aholisini AQSh rejimining fitnalariga berilmaslikka chaqirdi. Uning so'zlariga ko'ra, Vashington hukumati Kanadani parchalab yuborish va uni o'z nazoratiga olish uchun «bo'lib tashla va hukmronlik qil» usulidan foydalanmoqda.

Kalgari shahridagi mitingda so'zga chiqqan Karni dunyo tobora xavfli bo'lib borayotgani va chetdagi kuchlar Kanadani zaiflashtirishga urinayotganini iddao qildi. Garchi AQSh prezidenti Donald Trampning nomi to'g'ridan-to'g'ri tilga olinmagan bo'lsa-da, bu bayonotlar ikki davlat o'rtasidagi keskin savdo urushi va Trampning Kanadani AQShning 51-shtatiga aylantirish haqidagi tahdidlari davriga to'g'ri kelmoqda. Vashington va Ottava o'rtasidagi iqtisodiy ziddiyatlar chuqurlashib borayotgani kuzatuvchilar tomonidan tashvish bilan qayd etilmoqda.

Alberta provinsiyasi dunyodagi to'rtinchi yirik neft zaxiralariga ega bo'lib, mahalliy aholi uzoq yillardan beri Ottavadagi liberal siyosat hamda markaziy hokimiyat harakatlaridan norozi bo'lib keladi. Karni Albertadagi noroziliklar asnosida federal hukumat xatolarini tan olgan bo'lsa-da, bu ovoz berishni shunchaki norozilik belgisi sifatida ishlatmaslik kerakligini ta'kidladi. Uning fikricha, Kanadaga qarshi ovoz berish chuqur bo'linish va yillab davom etadigan noaniqliklarga olib kelishi mumkin.

Shu bilan birga, Albertadagi ayirmachilik harakati vakillari AQSh manfaatlari ularning siyosatiga ta'sir qilmayotganini bildirishmoqda. AQSh Moliya vaziri Skott Bessent Albertani tabiiy hamkor deb atagani va mahalliy ayirmachilar Davlat departamentida uchrashuvlar o'tkazgani haqidagi ma'lumotlar esa Vashingtonning ushbu jarayondagi ehtimoliy manfaatlaridan dalolat beradi.

Source: www.dw.com