Indoneziyaning Java orolidagi milliy bog‘da yuzaga kelgan kuchli o‘rmon yong‘inlarini bartaraf etishga urinayotgan to‘rt nafar kishi halok bo‘ldi. Bu haqda mamlakat O‘rmon xo‘jaligi vazirligi ma’lum qilib, so‘nggi o‘n yillikdagi eng og‘ir tabiiy ofatlardan biri davom etayotganini tasdiqladi.

Fojia payshanba kuni Sharqiy Java hududidagi Bromo Tengger Semeru milliy bog‘ida sodir bo‘lgan. Qurbonlarning shaxsi hozircha ochiqlanmagan, yana ikki kishi og‘ir kuyish jarohatlari bilan shifoxonaga yotqizilib, zarur tibbiy yordam ko‘rsatilmoqda.

Vazirlik halok bo‘lganlarning oila a’zolariga chuqur hamdardlik bildirib, xodimlar, ko‘ngillilar hamda mahalliy aholining jasoratini e’tirof etdi. Shuningdek, mazkur holat o‘rmon yong‘inlarini o‘chirish o‘ta xavfli jarayon ekanini ko‘rsatgani va xavfsizlik choralarini birinchi o‘ringa qo‘yish lozimligi ta’kidlandi.

Qayd etilishicha, Indoneziya so‘nggi yillardagi eng yirik o‘rmon yong‘inlaridan aziyat chekmoqda. Mamlakat rasmiylari sun’iy yo‘ldosh orqali mamlakat bo‘ylab yuzlab xavfli o‘choqlar aniqlanganini, qo‘shni davlatlar ham tutun va zaharli tuman ostida qolganini bildirdi.

Source: www.aljazeera.com