Tiranadagi bo'm-bo'sh qolgan auditoriyalar, yondirilgan binolar va o'zgarishlar talabi Albaniya bosh vaziri Edi Rama hokimiyati uchun so'nggi yillardagi eng jiddiy sinovga aylangan ommaviy norozilik harakatining markaziga chiqdi. Mamlakat poytaxtining qiyofasini o'zgartirib yuborayotgan dabdabali osmono'par binolar zamonaviy Yevropa poytaxti qiyofasini aks ettirishi kerak edi, biroq ana shunday binolardan birining tagida iqtisodiyot yo'nalishida magistrlatura bosqichida o'qiyotgan 22 yoshli Samanta ko'z yosh to'kmoqda. U ko'zdan yosh oqizuvchi gazdan himoyalanish uchun kiygan niqobini yechib, politsiya xodimlari qarshisida turgan holda 540 yevrolik maosh evaziga bunday minoralardan birortasidan qanday qilib kvartira sotib olish mumkinligini hayqirib so'radi.
May oyining oxiridan beri davom etayotgan noroziliklar AQSh prezidenti Donald Trumpning kuyovi Jared Kushner bilan bog'liq bo'lgan Zvernes qirg'oqbo'yi hududidagi ko'p million yevrolik turizm loyihasiga javoban boshlangan kengroq hukumatga qarshi "Flamingo inqilobi" harakatining bir qismidir. Biroq harakat vaqt o'tishi bilan Rama ma'muriyatiga qarshi yanada kengroq qarshilikka aylandi va so'nggi uch kun ichida talabalar namoyishlari zo'ravonlik bilan to'qnashuvlarga ulanib ketdi. Shaharda axlat qutilari, biznes obyektlari, binolar va banklar o'tga tutildi, ko'plab joylarni ko'zdan yosh oqizuvchi gaz qopladi, jami 152 kishi hibsga olindi va yuzlab fuqarolar tergov qilinmoqda.
Talabalar universitetlardagi og'ir sharoitlar, ta'lim narxi va bitiruvdan keyingi ish bilan ta'minlanish istiqbollari yo'qligidan qattiq g'azablangan bo'lib, ular bosh vazirning iste'foga chiqishini talab qilmoqda va boshqa hech qanday muzokaralarga rozi emasligini bildirishmoqda. Bosh vazir Edi Rama esa o'z navbatida yuzaga kelgan tartibsizliklarni muxolifat va "tashqi qo'llar" Yevropa Ittifoqiga qo'shilishga to'sqinlik qilishga urinishi sifatida baholab, iste'foga chiqishni qat'iyan rad etdi va hukumatlar faqat saylovlar orqali o'zgarishini ta'kidladi.
Muxolifatdagi Demokratik partiya yetakchisi Sali Berisha bosh vazurning zo'ravonliklar ortida tashqi kuchlar yoki muxolifat turgani haqidagi da'volarini rad etib, talabalar noroziliklarini oxirigacha qo'llab-quvvatlashini bildirdi. Shu bilan birga, fuqarolik jamiyati faollari va tahlilchilar bu voqealarni butun boshli avlodning uyg'onishi deb atamoqda, ammo muxolifat platformasi yo'qligi sababli faqatgina iste'foga erishishning o'zi yetarli siyosiy natija bermasligi mumkinligidan ogohlantirmoqda.
Source: www.dw.com