Rossiya kuchlarining Ukraina hududlari bo'ylab amalga oshirgan so'nggi havo hujumlari natijasida kamida sakkiz kishi halok bo'ldi va 60 dan ortiq kishi jarohat oldi. Ukraina rasmiylarining ta'kidlashicha, zarbalar mamlakat bo'ylab ikki savdo markaziga ham zarar yetkazgan hamda bir milliondan ziyod aholini elektr energiyasidan mahrum qilgan.

Xarkov viloyatida gubernator Oleg Sinegubovning so'zlariga ko'ra, uchta tumanga berilgan zarbalar oqibatida 71 yoshli ayol va 58 yoshli erkak halok bo'lib, 12 kishi yaralangan. Shuningdek, Donetsk viloyatining front chizig'idagi Kramatorsk shahrida ikki kishi, janubi-sharqiy Dnepropetrovsk viloyatida esa yana ikki nafar fuqaro hayotdan ko'z yumgan.

Polsha bilan chegaradosh Volin viloyatida dron zarbasi oziq-ovqat mahsulotlarini qayta ishlash korxonasiga kelib urilishi oqibatida bir kishi halok bo'lgan va sakkiz kishi jarohat olgan. Kovel shahrida esa dronlar bojxona terminaliga kelib urilib, o'nga yaqin yuk mashinasini yondirib yuborgan.

Ukraina Energetika vazirligi ta'mirlash brigadalari juma kuni o'chib qolgan bir milliondan ortiq iste'molchiga elektr ta'minotini qisman tiklaganini ma'lum qildi. Biroq Lutsk shahrida tarmoqdagi uzilishlar kamida 24 soat davom etishi mumkinligi aytilmoqda.

Shu fonida Birlashgan Millatlar Tashkiloti Ukrainada tinch aholi qurbonlari keskin oshib ketganidan xavotir bildirib, oktyabr oyining dastlabki ikki haftasi so'nggi yillardagi eng qonli davrlardan biri bo'lganini ta'kidladi.

Source: www.aljazeera.com