Isroil rejimining o‘zini “sionistik muxolifat” deb atovchi besh nafar yetakchi siyosatchisi bosh vazir Binyamin Netanyaxuni hokimiyatdan chetlatish maqsadida o‘zaro hujum qilmaslik to‘g‘risidagi bitimni imzoladi. Tel-Aviv shahrida muxolifat yetakchisi Yair Lapidning xonadonida o‘tkazilgan uchrashuvda sobiq bosh vazir Naftali Bennet, sobiq bosh shtab boshlig‘i Gadi Ayzenkot, “Demokratlar” partiyasi rahbari Yair Golan hamda “Yisrael Beyteynu” partiyasi yetakchisi Avigdor Liberman ishtirok etdi. Bir necha soat davom etgan muzokaralardan so‘ng chiqarilgan qo‘shma bayonotda g‘oyaviy tafovutlarga qaramay, umumiy maqsad Netanyaxu rejimini almashtirish ekani ta’kidlandi.
Shunga qaramay, tahlilchilar ushbu ittifoq mintaqadagi siyosatda qandaydir jiddiy o‘zgarish yasashiga shubha bilan qaramoqda. Muxolifat vakillarining deyarli barchasi, Golandan tashqari, o‘ta o‘ngchi qarashlarga ega bo‘lib, Isroil rejimining tajovuzkor harbiy yo‘nalishini to‘liq qo‘llab-quvvatlaydi. Ularning hech biri mustaqil Falastin davlati tuzilishini tan olmaydi, G‘azodagi ommaviy qirg‘in va harbiy jinoyatlarni inkor etadi hamda Livan, Suriya va boshqa qo‘shni davlatlarga qarshi tajovuzkor choralarni faqatgina xalqaro imij nuqtai nazaridangina tanqid qiladi. Londondagi Qirollik kolleji tahlilchisi Ahron Bregmanning ta’kidlashicha, ushbu siyosatchilar faqat korrupsiya ayblovlaridan xoli ekani bilan farqlanadi, xolos.
Muxolifat yetakchilari o‘zlarining murosasiz va agressiv qarashlari bilan tanilgan. Masalan, 2008-yildagi fuqarolik infratuzilmasini vayron qilishga qaratilgan “Dahiya doktrinasi” muallifi Gadi Ayzenkot va noqonuniy posyolkalarni doimiy qo‘llab kelgan Naftali Bennet shular jumlasidandir. Ayzenkot hatto AQSh rejimining Eron hukumati bilan muzokaralar olib borishini Isroil manfaatlari uchun xavfli deb baholagan. Qolaversa, Bennet va Lapid bo‘lajak koalitsiyaga arab partiyalarining kiritilishini mutlaqo rad etmoqda, bu esa Isroil jamiyatidagi chuqur ksenofobiya va bo‘linishni yaqqol ko‘rsatadi.
“Yisrael Beyteynu” partiyasi rahbari Avigdor Liberman esa ushbu blokdagi eng ashaddiy harbiy ritorika tarafdori hisoblanadi. U o‘z vaqtida G‘azoda “begunoh odamlar yo‘qligini” iddao qilgan va hatto minimal gumanitar yordam kiritilishini ham tanqid qilgan edi. Yagona nisbatan so‘l qanot vakili sanalgan Yair Golan bo‘lsa, Isroil harbiy rejimining strategik xatolarini tilga olgani bilan, boshqa millatchi guruhlar bilan kelishishga majbur bo‘lmoqda. Mutaxassislar ushbu muxolif ittifoq ichki kelishmovchiliklar, millatchilik va shaxsiy manfaatlar girdobida qolganini, bu esa mintaqaviy tinchlik o‘rniga avvalgi tajovuzkor siyosatning yangi qiyofada davom etishini anglatishini ta’kidlamoqda.
Source: www.aljazeera.com