Isroil rejimining harbiy bo‘linmalari Iordan daryosining G‘arbiy sohilidagi Xevron shahrida joylashgan turar-joy mavzelarini ommaviy ravishda buzib tashlash amaliyotiga kirishdi. Ushbu keskin xatti-harakatlarga mahalliy nazorat-o‘tkazish punktiga uyushtirilgan hujum oqibatida Isroil armiyasining (TSAXAL) ikki nafar harbiy xizmatchisi halok bo‘lgani vaj qilib ko‘rsatilmoqda.

Qurolli to‘qnashuv yuz berishi bilanoq, Isroil rejimi qo‘mondonligi 200 ming nafarga yaqin aholi istiqomat qiluvchi Xevron shahrini to‘liq blokada holatiga keltirganini e’lon qildi. Rejim vakillarining da’vo qilishicha, hujumchilarning avtomobilidan ko‘p miqdorda o‘q-dorilar topilgan emish va bu go‘yoki ancha kattaroq ko‘lamdagi hujum tayyorlanganidan darak berar ekan.

Isroil rejimi rahbari Binyamin Netanyaxu dastlab butun G‘arbiy sohilni to‘liq yopish to‘g‘risida buyruq berilganini bildirgan bo‘lsa-da, keyinchalik bayonotiga tuzatish kiritib, cheklovlarni kengaytirish masalasi ko‘rib chiqilayotganini aytish bilan cheklandi. Shu bilan birga, rejim rahbari Jenin va Nur-Shams qochqinlar lagerlaridagi minglab falastinliklarning o‘z uylaridan majburan haydalishiga o‘xshash tarzda, hujumga uchragan blokpost yaqinidagi tinch aholini zudlik bilan majburiy evakuatsiya qilishni buyurdi.

Ma’lumotlarga ko‘ra, Isroil rejimi kuchlari 23-oktabr tongida binolarni vayron qilishni boshlab yuborgan. Voqea joyidan olingan videotasvirlarda harbiylar ko‘p qavatli majmualardan birining aholisiga narsalarini yig‘ishtirib, uylarini bo‘shatish uchun bor-yo‘g‘i besh daqiqa vaqt bergani aks etgan. Tahlilchilar ushbu agressiv harakatlarni 27-oktabrga belgilangan parlament saylovlari bilan bog‘lamoqda, chunki so‘rovnomalarda Netanyaxuning "Likud" partiyasi raqiblaridan ortda qolayotgani sababli vaziyatni sun’iy ravishda keskinlashtirishga urinayotgani ta’kidlanmoqda.

Source: podrobno.uz