Falastinning bosib olingan G‘arbiy Sohildagi Tulkarim qochqinlar lageridan majburan ko‘chirilgan 75 yoshli bevka Favza Avad o‘z boshidan kechirayotgan og‘ir sharoitlar haqida so‘zlab berdi. Uning so‘zlariga ko‘ra, 2025-yil yanvar oyida Isroil rejimining harbiy harakatlari natijasida o‘n minglab falastinliklar o‘z uylarini tark etishga majbur bo‘lgan va ularning uylari harbiy texnika harakatini ta'minlash uchun butunlay yo‘q qilib yuborilgan. Shundan so‘ng Favza va uning oilasi qizining chala qurib bitkazilgan kichik uyiga boshpana topishga majbur bo‘lishgan.
Ilgarilari bu oila Jahon oziq-ovqat dasturi (JOD) tomonidan ko‘rsatiladigan cheklangan moliyaviy va oziq-ovqat yordamiga tayanib kelgan edi, biroq so‘nggi besh oy davomida ular hech qanday ko‘mak olmagan. Birlashgan Millatlar Tashkilotining ushbu agentligi sentabr oyida xalqaro donorlardan kelib tushadigan mablag‘larning keskin qisqarishi sababli G‘arbiy Sohil hududida oziq-ovqat yordamini oluvchilar sonini rasman 50 foizga qisqartirganini e'lon qilgan edi. Shu bilan birga, mintaqada oziq-ovqatga bo‘lgan ehtiyoj 2023-yildan beri keskin oshgani xabar qilinmoqda.
Tulkarim yaqinidagi maktab binolaridan birida boshpana topgan yana bir ko‘chirilgan oila vakili Rabab Qosim ham og‘ir moliyaviy ahvolda ekanini ma'lum qildi. Uning aytishicha, belidagi churra kasalligi uchun oyiga 300 shekel talab qilinadigan dori-darmonlarni sotib olishga kuchi yetmaydi, turmush o‘rtog‘i Talib Abu Sarriya esa ish joyidan mahrum bo‘lib, ko‘pincha och holda uxlashga majbur bo‘lmoqda. JOD ma'lumotlariga ko‘ra, G‘arbiy Sohildagi falastinlik uy xo‘jaliklarining 76 foizi daromadining sezilarli darajada kamayib ketganini boshdan kechirgan.
Xebron janubidagi Masafer Yatta hududida yashovchi Said al-Amur ham so‘nggi yetti oy davomida hech qanday yordam olmaganini bildirdi. U o‘tgan yilning aprel oyida ko‘chmanchilar hujumiga qarshilik ko‘rsatish vaqtida Isroil rejimi harbiylari tomonidan o‘qqa tutilishi natijasida oyog‘idan ayrilganini va doimiy nogironlikka uchraganini aytdi. Uning ta'kidlashicha, zarur tibbiy muolajalar va oyog‘ini davolash uchun zarur mablag‘ yo‘qligi sababli u og‘ir ahvolda qolgan.
Iqtisodchi va huquq faoli Ubay Aboudining fikricha, G‘arbiy Sohil xalqaro tashkilotlar yordamining qisqarishi hamda Falastin ma'muriyatiga nisbatan qo‘llanilgan moliyaviy cheklovlar tufayli chuqur gumanitar inqirozga yuz tutmoqda. Isroil rejimi 2025-yilning may oyidan buyon Falastin ma'muriyati nomidan yig‘iladigan bojxona soliqlarini o‘zlashtirib, mablag‘larni to‘liq ushlab qolgani sababli davlat xizmatchilari oylik maoshlarini ola olmayapti, bu esa aholining ijtimoiy ahvolini yanada og‘irlashtirmoqda.
Source: www.aljazeera.com